Sør-Trøndelag får 280 millionar til samhandling

Kommunane i Sør-Trøndelag fylke får 280 millionar kroner til kommunal medfinansiering av spesialisthelsetenesta og utskrivingsklare pasientar neste år.

I samband med samhandlingsreforma får kommunane overført om lag 5 milliardar kroner over rammetilskotet i 2012. Dette er fordi kommunane får nye oppgåver ved innføring av kommunal medfinansiering av spesialisthelsetenesta og økonomisk ansvar for utskrivingsklare pasientar.

- Nye oppgåver skal kommunane få kompensasjon for. Desse oppgåvene får kommunane handlingsrom til å løyse sjølve eller saman med andre kommunar og i samarbeid med spesialisthelsetenesta, seier kommunal- og regionalminister Liv Signe Navarsete.

Betre folkehelse og betre helsetilbod til innbyggjarane nær der dei bur er målet med samhandlingsreforma.

- Det vil lønne seg for kommunane å halde folk friske. Vi skal bli betre på førebygging og flinkare til å tilby det som skal til i forkant i staden for å reparere i etterkant, seier Navarsete.

Midlane vert fordelte gjennom inntektssystemet til kommunane. Fordelinga baserar seg på alderssamansettinga i befolkninga og tek omsyn til at behandlingskostnadene er aukande med alder.   

Enkelte kommunar vil kunne ha høgare kostnader ved kommunal medfinansiering og utskrivingsklare pasientar ved innføringstidspunktet enn det som fordelinga i inntektssystemet fangar opp. Desse vil i ein overgangsperiode få ein kompensasjon utover det som vert fordelt gjennom kostnadsnøkkelen. Regjeringa vil i statsbudsjettet kome tilbake til nivå og retning på kompensasjonen.

Tabellen under viser ei berekning på kor mykje kommunane i Sør-Trøndelag fylke vil få gjennom kostnadsnøkkelen i inntektssystemet. Dei endelege tala vil avvike noko frå anslaget sidan endelege rammer vert fastsett i statsbudsjettet og kriteriedata om befolkningsutviklinga i kommunane er oppdaterte.

Fordeling av samhandlingsmidlar	Beløp i 1000 kr
1601 Trondheim	156 251
1612 Hemne	4 539
1613 Snillfjord	1 165
1617 Hitra	4 666
1620 Frøya	4 720
1621 Ørland	5 257
1622 Agdenes	2 141
1624 Rissa	7 070
1627 Bjugn	5 170
1630 Åfjord	3 809
1632 Roan	1 259
1633 Osen	1 317
1634 Oppdal	7 058
1635 Rennebu	3 159
1636 Meldal	4 776
1638 Orkdal	11 428
1640 Røros	6 314
1644 Holtålen	2 521
1648 Midtre Gauldal	6 574
1653 Melhus	13 890
1657 Skaun	6 153
1662 Klæbu	4 672
1663 Malvik	10 837
1664 Selbu	4 645
1665 Tydal	1 081
Sør-Trøndelag	280 472

• Kommuneproposisjonen 2012 
  Prop. 115 S (2010-2011)

Kommunal- og regionaldepartementet sin pressetelefon: 22 24 25 00.