- Søk om å bli Årets nynorskkommune 2012
Historisk arkiv
Publisert under: Regjeringen Stoltenberg II
Utgjevar: Kommunal- og regionaldepartementet
Pressemelding | Dato: 26.06.2012
No kan alle nynorskkommunar og –fylke søkje om å få prisen Årets nynorskkommune 2012. – Prisen skal stimulere til god nynorskbruk i kommunane, seier kommunal- og regionalminister Liv Signe Navarsete.
No kan alle nynorskkommunar og –fylke søkje om å få prisen Årets nynorskkommune 2012. – Prisen skal stimulere til god nynorskbruk i kommunane, seier kommunal- og regionalminister Liv Signe Navarsete.
Prisen Årets nynorskkommune blir delt ut for fjerde gong i haust. Navarsete er oppteken av at det offentlege brukar nynorsk aktivt i tenestene sine.
- Nynorsk er ein viktig del av vår nasjonale kulturarv. Målforma har ein sentral plass i vår nasjonale litteratur. Nynorsk skapar identitet og nærleik. Ein nynorskkommune profilerer kommunen sin godt på nynorsk, seier statsråden.
Tidlegare vinnarar er Stord, Seljord og Fjell kommunar. Det er 114 nynorskkommunar og tre fylkeskommunar med nynorsk som målform i Noreg. No håpar statsråden at mange av dei meiner dei fortener prisen – og søkjer.
- Føremålet med å opprette prisen er å stimulere til god nynorskbruk i kommunane. Eg har håp om at nynorskprisen vil gjere kommunane stolte over å ha vald nynorsk som målform, seier Navarsete.
Søknadsfristen er 1. oktober.
Kommunal- og regionaldepartementet sin pressetelefon: 22 24 25 00