34,2 millionar til regional utvikling i Rogaland

Regjeringa gjer framlegg om at tilskotet til Rogaland fylkeskommune for regional utvikling blir på om lag 34,2 millionar kroner i 2013.

I statsbudsjettet for 2013 foreslår regjeringa å løyve rundt 2,7 milliardar kroner til ein ekstrainnsats i distrikts- og regionalpolitikken. Fylkeskommunane skal forvalte vel 79 prosent av desse midlane.

Gjennom distrikts- og regionalpolitikken ynskjer regjeringa å leggje til rette for busetjing og verdiskaping i heile landet.
 
- Kjernen i det regionale utviklingsarbeidet er å fremje ei heilskapleg samfunnsutvikling. Fylkeskommunane er med på å utvikle attraktive stader og auke verdiskapinga til næringslivet i heile landet. Dei handlar ut frå eigne utfordingar og mål, er gode pådrivarar og samarbeidspartnarar for regional uvikling og får ting til å skje i lokalsamfunna våre, seier kommunal- og regionalminister Liv Signe Navarsete.

Av løyvinga til Rogaland er 6,87 millionar kroner sette av til kommunale eller regionale næringsfond. Midlane skal setje næringssvake kommunar eller regionar betre i stand til å støtte opp om lokal næringsutvikling.

4 millionar kroner av løyvinga til Rogaland er sette av til å møte omstillingsutfordringar.

Etter årsskiftet vil fylket òg få kompensasjon for auka arbeidsgivaravgift. I 2012 var kompensasjonsmidlane i Rogaland 16,3 millionar kroner.

• Les korleis Rogaland fylkeskommune nytta dei regionale utviklingsmidlane i 2011
• Kommunal- og regionaldepartementet si samleside for statsbudsjettet i 2013

Kommunal- og regionaldepartementet sin pressetelefon: 22 24 25 00.