Hasvik kommune med i satsinga ”Bustadetablering i distrikta”

Hasvik er ein av 12 kommunar som får å ta del i den nye treårige satsinga ”Bustadetablering i distrikta”. 

- Det har vore krevjande  å plukke ut dei beste av 82 søknadar. At heile 82 kommunar søkte om å ta del i satsinga syner at ”Bustadetablering i distrikta”  både er eit attraktiv og viktig tiltak, seier kommunal- og regionalminister Liv Signe Navarsete.

”Bustadetablering i distrikta” er ei treårig satsing. I 2012 er det sett av 20 millionar kronar til satsinga. Husbanken har ansvar for koordinering.

Målet er å auke bustadtilbodet i distrikta. Nokre stader er bustadmarknadene små og usikre. Andre plassar manglar det bustader. Kommunar kan ha arbeidsplassar, men ikkje bustader til tilflyttarar. Tilskot til bustadetablering vil gjere det lettare å rekruttere kompetanse til slike kommunar, seier Navarsete.

I søknaden peikar Hasvik på at dei no har ein auke i folketalet, optimismen aukar og næringslivet er meir robust. I dei tre fyrste kvartala i 2011 flytta 74 personar til Hasvik. Kommunen og næringslivet har saman arbeidt for å busetje desse framfor at dei skal bli pendlarar inn til kommunen. Ei av dei viktigaste utfordringane er å finne bustader, både for leige og eige.

Kommunal- og regionaldepartementet sin pressetelefon: 22 24 25 00