Vest-Agder fylkeskommune satsar på næringsutvikling

Om lag halvparten av dei regionale utviklingsmidlane i Vest-Agder i 2011 gjekk til næringsutvikling. Resten av midlane var ganske likt fordelte på stadutvikling og profilering, samt infrastruktur.

Dette går fram av rapporteringa til Kommunal- og regionaldepartementet om bruken av midlane til regional utvikling i 2011. I Vest-Agder fylke blei det fordelt om lag 43 millionar kroner til dette føremålet. Til saman fordelte alle fylkeskommunane om lag 2,6 milliardar kroner til regional utvikling i 2011.

Fylkeskommunane har ei sentral rolle som pådrivar og initiativtakar for å skape ønskt samfunnsutvikling i eigen region på område som er viktige for folk og næringsliv, som næringsutvikling, samferdsle og utdanning. Størsteparten av Kommunal- og regionaldepartementet  sine midlar til distrikts- og regionalpolitikk går difor gjennom fylkeskommunane. Fylkeskommunane samarbeider med kommunar, næringsliv, kunnskapsinstitusjonar og ulike statsetatar for å få til verdiskaping, gode rammevilkår og attraktive stadar. 

- Regjeringa har gitt fylkeskommunane eit heilskapleg ansvar for regional utvikling. Me ser at Vest-Agder fylkeskommune tenker breitt og vel å bruke dei regionale utviklingsmidlane både på næringsutvikling, stadutvikling og infrastruktur. Det blir spanande å følgje resultata av denne breie satsinga, seier kommunal- og regionalminister Liv Signe Navarsete.

Bruken av midlane i Vest-Agder fylkeskommune tok utgangspunkt i Regionplan Agder 2020, som er felles for begge Agder-fylka, og i dei årlege regionale tviklingsprogramma for Agder generelt og  Aust-Agder spesielt.

Fylkeskommunen rapporterer om utfordringar med nyskaping og omstilling i næringslivet for å betre konkurranseevna. Det er behov for betre å utnytte lokale fortrinn og ressursar for å  vidareutvikle småsamfunn. For å møte desse utfordringane har fylkeskommunen løyvd midlar til næringsutvikling. Prosjekt som fekk midlar av fylkeskommunen i 2011 var mellom anna Sørlandet kunnskapspark AS, Lister nyskaping og Lindesnesregionen næringshage, som har som oppgåve å etablere nye og vidareutvikle eksisterande bedrifter. Også etablerarsenteret EVA, som gir bedriftsrådgivning og kurs, har fått støtte. Fylkeskommunen gav vidare midlar til etablerartilskot og bedriftsutvikling i distrikta gjennom Innovasjon Noreg.           

Klima og Energi var eit viktig satsingsfelt i 2011. Eksempel på dette er: Klimatiltak (vassbasert effektiv energiproduksjon, effektivitet i overføringane og effektivitet i forbruket i eigne anlegg).Tilstrekkeleg og sikker forsyning av energi. Verdiskaping innan leverandørindustrien til offshore vind. Satsing på pumpekraft gjennom kraftutveksling med utlandet.

I satsinga på unge har fylkeskommunen løyvd midlar til ungdoms- og studentbedrifter gjennom Ungt Entreprenørskap og til programmet Unge forbilde, som skal auke interessa for og rekrutteringa til real- og teknologifag. Vest-Agder fylkeskommune løyvde 24 prosent av midlane til stadutvikling og profilering.

Fylkeskommunen fordelte 20 prosent av midlane til infrastruktur, og desse gjekk mellom anna til mobildekning og breiband.  

Sjå elles:

• Faktaark om dei regionale utviklingsmidlane (pdf)
• Mål for programkategori 13.50 Distrikts- og regionalpolitikk (pdf)
• Tabell over fylkeskommunane si prosentvise fordeling av midlane etter arbeidsmål (pdf)
• Tabell over løyvde regionale utviklingsmidlar til alle fylkeskommunane (pdf)
• Fylkeskommunane som regionale utviklingsaktørar
• Illustrasjonar (Flickr)
• Vest-Agder fylkeskommune

Kommunal- og regionaldepartementet sin pressetelefon: 22 24 25 00.