96,84 millionar kroner til breiband i 2013

Regjeringa gir i år 96,84 millionar kroner til fylkeskommunane, og har sidan 2006 løyvd meir enn ein milliard kroner til breibandsformål over heile landet.

- Tilgang til breiband med høg kapasitet er naudsynt i heile landet for at alle skal kunne ta del i samfunnsutviklinga og for å sikre vekst i næringslivet, seier kommunal- og regionalminister Liv Signe Navarsete.

Sjølv om dei fleste bur i område med tilbod om breiband i dag, har mange stader behov for ”breiare” breiband. Regjeringa har difor satsa på å stimulera til utbygging i område der det ikkje er kommersielt lønsamt å byggje ut.

- Betre og raskare breiband er naudsynt for at bedrifter skal kunne etablere seg eller utvikle seg i alle deler av landet, seier Navarsete. Breiband er god samfunnsøkonomi og heilt avgjerande for å møte framtidige behov innan skule, helse og næringsliv, og for å hindre digitale klasseskiljer.

- Utbygging av breiband er viktig for at folk skal kunne busetje seg der dei sjølve ønskjer, seier statsråden.

Regjeringa har som mål at 100 prosent av husstandane i Noreg dei næraste åra skal få eit tilbod om breibandsdekning av grunnleggjande god kvalitet. Regjeringa vil difor i åra framover sette av minst 150 millionar kroner til utbygging av breiband i område som i dag ikkje har eit slikt tilbod. I tillegg vil Regjeringa setje krav til ein dekningsgrad på minst 98 prosent ved tildeling av frekvensar for mobilt breiband.

Fordelinga i 2013

	Fordeling til breiband og anna infrastruktur 2013 (i mill kr)
Østfold	0,33
Hedmark	5,14
Oppland	5,14
Buskerud	1,99
Telemark	4,44
Aust-Agder	1,81
Vest-Agder	2,16
Rogaland	1,94
Hordaland	5,27
Sogn og Fjordane	6,34
Møre og Romsdal	8,93
Sør-Trøndelag	5, 66
Nord-Trøndelag	7,07
Nordland	19,52
Troms	12,46
Finnmark	8,64
Sum	96,84

Kommunal- og regionaldepartementet sin pressetelefon: 22 24 25 00.