Bergen får meir pengar

Regjeringa legg opp til auke i dei samla inntektene til kommunesektoren på mellom 7 og 7½ milliardar kroner i 2009. Dette kjem i tillegg til inntektsauken frå 2005 til 2008 på om lag 20 milliardar kroner. Det er viktig å streke under at dette er reell inntektsauke. Det vil seie at kommunane får kompensert pris- og lønsauke. På toppen av dette legg vi på realinntektsauken.

Satsinga på kommunane under den raudgrøne regjeringa står i sterk kontrast til den høgredominerte politikken i førre stortingsperiode. Kommunane fekk 9 milliardar kroner lågare inntektsauke i førre stortingsperiode enn dei får i denne perioden.

Den raudgrøne regjeringa har gjeve kommunane økonomiske rammevilkår til å byggja ut tenestetilbodet. Inntektsauken har gjeve rom for til saman 24 000 nye årsverk i kommunesektoren i 2006 og 2007. 26 000 fleire barn har fått barnehageplass dei siste to åra. Vi er nær målet om 10 000 nye årsverk i pleie- og omsorgstenesta. Denne auken har kome i dei fleste av kommunane i landet, også i Bergen.

Regjeringa har lagt fram forslag til endringar i fordelinga av inntektene til kommunane. Det er i dag store skilnader i inntektsnivået mellom kommunane, noko som medfører større skilnader i tenestetilbodet enn det vi meiner er rimeleg.

Det vil alltid vere slik at når ein gjer endringar i inntektsfordelinga, vil nokre kommunar tape, medan andre vinn. Bergen taper isolert sett på dei føreslegne endringane. For å motverke dei uheldige verknadene dette kan få for tenestetilbodet, har regjeringa lagt opp til ein sterk auke i inntektene til kommunesektoren i 2009. Dette kjem alle kommunane til gode. Trass i at fordelingssystemet mellom kommunane vert noko endra, får Bergen ein auke i dei frie inntektene i 2009 på om lag 70 millionar kroner. Dette kjem i tillegg til ein samla auke i dei frie inntektene på knapt 400 millionar kroner som Bergen har fått av den raudgrøne regjeringa i 2006, 2007 og 2008 og er eit resultat av regjeringa si prioritering av kommunane. Røynslene frå førre stortingsperiode gjev ikkje grunnlag for å tru at Bergen ville fått meir pengar av ein kommunalminister frå Høgre.

Bergen har høge utgifter knytt til sosiale problem, rus og psykiatri. Denne type utgifter vert kompenserte gjennom ein eigen kostnadsnøkkel i inntektssystemet. Bergen får med andre ord kompensasjon for desse utgiftene. Det er ikkje føreslege endringar i inntektssystemet i 2009 på dette punktet.