Filmsatsinga fortset i 2012

Regjeringa held fram satsinga på film og foreslår ein auke til filmfeltet på 47 millionar kroner.

I kulturbudsjettet for 2012 foreslår regjeringa å løyve totalt 706,8 millionar kroner til film- og medieformål. Av dette er 423 millionar kroner direkte støtte til audiovisuelle produksjonar via Norsk filminstitutt.

Auken gir rom for ei særskild satsing på nye regitalent innan kinofilm – Nye veier til lange filmer. Denne satsinga under Norsk filminstitutt inneber moderat kjønnskvotering og vil også vere eit verkemiddel for å betre kjønnsbalansen innan norsk filmproduksjon.

Tilskotet til utvikling av dataspel aukast med minst 5 millionar kroner. Målet er å doble tilskota til utvikling av dataspel frå 2011-nivå innan 2013.

Den totale auken på feltet gjer det også mogleg å gjennomføre lovnaden om dobling av tilskota til fjernsynsdrama. Med dette er tilskota til fjernsynsdrama auka frå 16 millionar kroner i 2010 til 32 millionar kroner i 2012.

Kulturløftet II har som mål at det skal satsast på filmmiljø i regionane. Den regionale filmsatsinga er ein del av den samla nasjonale filmpolitikken. Regjeringa følgjer opp dette med 5,4 millionar kroner meir til regionale filmtiltak i 2012.

Regjeringa løyver dessutan 3,5 millionar kroner til å innføre ei innkjøps- og utlånsordning for norsk film i biblioteka.