Vikingskipet – tilsegn om tilskot til oppgraderings- og rehabiliteringstiltak i 2013

Kulturdepartementet gir tilsegn om 3 millionar kroner i tilskot til oppgraderings- og rehabiliteringstiltak i Vikingskipet.

Vikingskipet, arenaen for hurtigløp på skøyter under OL i 1994, har status som nasjonalanlegg.

Etter 20 års drift er det stort behov for rehabilitering og oppgradering av anlegget. Hamar Olympiske Anlegg AS har laga ein plan for systematisk og langsiktig arbeid for å halde anlegget i tidsmessig stand. I denne omgangen skal det gjennomførast fleire tiltak, mellom anna arbeid med driftstryggleik og reservesystem i Vikingskipet i tillegg til ei rad mindre oppgraderings- og rehabiliteringstiltak.

- Vikingskipet har spela og vil framleis spele ei viktig rolle for skøyteidretten både nasjonalt og internasjonalt, seier kulturminister Hadia Tajik. - Det er viktig at anlegget til kvar tid oppfyller krava som idretten stiller. Med dette tilskotet er det mogeleg å vidareføre den systematiske oppgraderings- og rehabiliteringsprosessen som allereie er i gang, seier kulturminister Tajik.