Trong for auka investering i u-landslandbruket

Investeringane i landbruket i mange U-land har vore for låge i fleire tiår. - Det er viktig å snu denne utviklinga, sa landbruks- og matminister Lars Peder Brekk då han måndag møtte studentar for fleire land frå Afrikas Horn på Universitetet for miljø- og biovitskap.

Landbruks- og matminister Lars Peder Brekk har møtt studentar for fleire land frå Afrikas Horn på Universitetet for miljø- og biovitskap. Brekk ønska råd frå studentar frå Somalia, Etiopia og Eritrea om korleis det er mogleg å gjere landbruket i deira heimland meir robust. Derfor besøkte han Institutt for internasjonale miljø- og utviklingsstudier (Noragric) på UMB. Les heile innlegget til Brekk (engelsk) Både tørke og andre ytre faktorar gjer situasjonen i landbruket svært vanskeleg. Akkurat no er landa i denne delen av Aust-Afrika ramma av den verste tørken på fleire tiår. For å betre situasjonen er det svært viktig å betre transportforholda. Vegnettet er ikkje i stand til å handtere transportbehovet til landbruket, meiner studentane Brekk møtte. Fleire av dei var svært opptatte av at landa deira treng hjelp til å organisere både landbruket og distribusjonen av landbruksprodukt.

Investeringane i landbruket i mange U-land har vore for låge i fleire tiår. - Det er viktig å snu denne utviklinga, sa landbruks- og matminister Lars Peder Brekk då han møtte studentar frå Afrikas Horn. (Foto: Landbruks- og matdepartementet)

- Det er svært nyttig for meg å få med desse synspunkta. Trongen er stor for å auke investeringane i landbruket og stimulere dei små familiebrukseiningane, sa Brekk. Han understreka også at vern av matjorda er ei global utfordring. Konkurransen om jord og vann er stor alt i dag.

- I 2050 må verdas bønder syte for mat til 9,1 milliardar menneske. Dette lar seg ikkje gjere utan at produksjonen skjer på berekraftig vis. Vi treng i staden landbruksmetoder som sikrar ei sunn og frisk matjord og reduserer negative miljøeffektar, sa landbruks- og matministeren.