Innsats mot pærebrann gjev gode resultat
Historisk arkiv
Publisert under: Regjeringen Stoltenberg II
Utgiver: Landbruks- og matdepartementet
Nyhet | Dato: 02.04.2013
Gjennom overvaking, kartlegging og tiltak har "Aksjon Pærebrann" oppnådd effektive resultat mot pærebrann i 2012. Den frykta plantesjukdommen er no utrydda fleire stader i landet.
Gjennom overvaking, kartlegging og tiltak har "Aksjon Pærebrann" oppnådd effektive resultat mot pærebrann i 2012. Den frykta plantesjukdommen er no utrydda fleire stader i landet.
Saman med Mattilsynet la Bioforsk nyleg fram prosjektrapporten til “Aksjon Pærebrann” om overvaking, kartlegging og tiltak mot pærebrann i Noreg i 2012.
Pærebrann er ein bakteriesjukdom som først og fremst går på pære og eple. Men også mispelartar blir angripne. Den populære prydveksten i hagar og parkanlegg er dermed ofte vertplante. Angripne busker og tre må fjernast for å sanere smitten.
Sjukdommen har vore kjend i USA i over 200 år, men kom til Europa først i 1956. Det finst ikkje effektive, kjemiske middel mot pærebrann som derfor er vanskeleg å fjerne. Då sjukdommen blei påvist i Noreg i 1986, starta Mattilsynet og Bioforsk Plantehelse “Aksjon Pærebrann”. Føremålet har vore å overvake, kartlegge og setje i verk tiltak mot pærebrann i Noreg. I 1993 såg sjukdommen ut til å være utrydda, men i august 2000 blei bakterien igjen påvist, og seinare har det årleg vore registrert utbrot.
Systematisk kontroll
Det blir kvart år gjort systematisk stikkprøvekontroll i mange område i Sør-Noreg med spesiell vekt på kontroll i frukthagar og planteskolar.
Til saman blei det utført 15 458 inspeksjonar av vertplanteførekomstar fordelt på 13 fylke og 100 kommunar i 2012. Alle nye sjukdomsutbrot som blei påvist i fjor blei sanert i løpet av året. I dei fleste tidlegare smitta områda har det vore utført ein systematisk gjennomgang og fjerning av sjuke planter.
Bioforsk er organisert under Landbruks- og matdepartementet (LMD) som eit forvaltningsinstitutt med særskilde fullmakter.