- Det er ei alvorleg sak vi har vore gjennom i vinter. Derfor må vi ha ei oppsummering og evaluering av alle relevante sider ved saka. Styresmaktene sitt arbeid må stå sentralt i dette. Internasjonal ekspertise vil bli trekt inn, slik at denne etterprøvinga blir gjort av folk som ikkje sjølve har vore involvert i saka, seier landbruks- og matminister Terje Riis-Johansen.

Ei aggressiv stamme av bakterietypen E.coli O:103 i kjøttvarer har gjort at mange har blitt sjuke, og eit barn har døydd. Regjeringa har varsla ei fullstendig, ekstern gjennomgang av styresmaktene sitt arbeid med E. coli-saka. Gjennomgangen skal femne om både faglege og kommunikasjonsmessige sider ved saka. Internasjonal kompetanse vil bli trekt inn i evalueringa. I framlegget til Revidert nasjonalbudsjett er det sett av 1 mill. kroner på Landbruks- og matdepartementet sitt budsjett til denne evalueringa.

RNB: Det blir løyvd 1 million kroner til evaluering av styresmaktene sitt arbeid med E.coli-saka.