Opna Skrim og Sauheradfjella naturreservat

Statssekretær Heidi Sørensen opna fredag Skrim og Sauheradfjella naturreservat saman med  statssekretær Ola Heggem frå Landbruks- og matdepartementet. Området er det største norske naturreservatet som er verna gjennom frivillig skogvern.

Skrim og Sauheradfjella naturreservat ligg i kommunane Kongsberg, Notodden, Sauherad og Skien i Buskerud og Telemark. Området er på til saman 123 kvadratkilometer og blei verna som naturreservat 19. desember 2008. Naturreservatet er det nest største av alle skogreservat i Noreg.

Statssekretær Heidi Sørensen retta ein stor takk til grunneigarane som frivillig har bidrege med areal slik at viktige naturverdiar no er sikra for ettertida. Ho takka også Noregs Skogeigarforbund som har vore ein sentral og viktig medspelar for å få avtalen i hamn.

Dette naturreservatet har store verdiar berre i kraft av sin storleik. Det har mange ulike naturtypar og mykje gamal naturskog. Det er rikt på bekkekløftar og har viktige forekomstar av artar som står på den norske raudlista. 

Hensikta med vernet er å ta vare på det urørte preget med alt sitt biologiske mangfald, både naturtypar, økosystem, artar og økologiske prosessar. Området er eit regionalt viktig friluftsområde og brukast mykje til turgåing, jakt og fiske.