Nasjonalparkstyre for Børgefjell nasjonalpark utnemnd

Miljøverndepartementet har utnemnd nasjonalparkstyret som skal forvalte Børgefjell/Byrkije nasjonalpark i Nordland og Nord-Trøndelag fylker og for Austre Tiplingan/Luvlie Diehpell landskapsvernområde i Nordland fylke.

Dette er eit ledd i innføringa av den nye forvaltningsmodellen for verneområde. Kommunane, fylkeskommunane og Sametinget får gjennom deltaking i nasjonalparkstyret ansvaret for å forvalte store nasjonale verdiar.

Det er særs gledeleg at kommunane Grane, Hattfjelldal, Namsskogan og Røyrvik  saman med Nordland fylkeskommune, Nord-Trøndelag fylkeskommune og Sametinget vil ta ansvar med å ivareta dei unike naturverdiane i Børgefjell/Byrkije nasjonalpark og i Austre Tiplingan/Luvlie Diehpell landskapsvernområde.

- Nasjonalparkstyret får eit stort ansvar på vegne av heile nasjonen for å forvalte viktige nasjonale og internasjonale naturverdiar, seier miljøvernminister Bård Vegar Solhjell.

Nasjonalparkstyret for Børgefjell/Byrkije nasjonalpark og Austre Tiplingan/Luvlie Diehpell landskapsvernområde vil bestå av: Bjørn Ivar Lamo frå Grane kommune, Asgeir Almås frå Hattfjelldal kommune, Stian Brekkvassmo frå Namsskogan kommune, Arnt Michelsen frå Røyrvik kommune, Marit Tennfjord frå Nordland fylkeskommune, Anne Marit Mevassvik frå Nord-Trøndelag fylkeskommune og Algot Jåma, Liv Karin Joma og Gunhild Nerli utpekt av Sametinget.  

Nasjonalparkstyret skal gjere vedtak og gjennomføre tiltak innanfor ramma av verneforskriftene slik at naturverdiane i nasjonalparken og landskapsvernområdet vert sikra for komande generasjonar. 

Innføringa av denne nye forvaltningsmodellen for verneområda skjer på bakgrunn av regjeringa sitt framlegg i Miljøverndepartementet sin budsjettproposisjon for 2010 (Prop. 1 S (2009-2010)). Stortinget har slutta seg til dette.