Innlegg: Samanheng mellom ekstremvêr og global oppvarming

Det er viktig at det blir stilt gode spørsmål om klima- og miljøpolitikken. Såvidt eg skjøner, vil Lomborg at vi skal rette merksemda mot dei aller viktigaste sakene, enten det handlar om miljø eller fattigdom. Der er Lomborg og eg einige.

Samanhengen mellom menneskelege klimautslepp, global oppvarming og ekstremvêr er meir enn ei antaking. Nyare forsking viser ein klar samanheng mellom omfattande naturkatastrofar og global oppvarming. Når verda blir varmare som følge av klimautsleppa, blir det meir sannsynleg med nye varmerekordar slik vi har sett i USA i 2011 og 2012.

FNs klimapanels spesialrapport om handtering av risiko ved katastrofar og ekstremvêr viser at enkeltepisodar med ekstremvêr som rekordvarme og ekstrem nedbør vil kunne inntreffe oftare i framtida. Ekstreme vêrhendingar i Aust-Afrika, Texas og Europa kan knytast til menneskeskapte klimaendringar, viser ein studie publisert av American Meteorological Society i juli 2012.

En annan studie, av klimaforskarane Jennifer A. Francis og Stephen J. Vavrus frå mars 2012, tyder på at lange periodar med stabilt vêr, også stabilt ekstremvêr, kan skuldast at havisen i Arktis smeltar med rekordfart.

Ekstreme tørkeepisodar slik vi har sett dei siste åra er definitivt ein del av klimautfordringa. Med dei konsekvensane dette kan ha for liv, helse og matproduksjon er det også eit særleg viktig spørsmål som det er bra at media fokuserer på.