Eriksen og Verheugen til Melkøya

Visepresidenten i EU-kommisjonen, Günter Verheugen, hadde denne veka politiske samtalar med nærings- og handelsminister Odd Eriksen. Måndag besøkte dei to Snøhvit-anlegget på Melkøya ved Hammerfest.

Verheugen har ansvaret for EUs nærings- og industripolitikk, og dei to drøfta tidlegare på dagen aktuelle saker om bord på Hurtigruta. Nærings- og energipolitiske moglegheiter og utfordringar i nordområda var eit sentralt tema under samtalane. Verheugen har hovudansvaret for å skapa vekst og arbeidsplassar i Europa, gjennom den såkalla Lisboa-strategien.

- Det er viktig for Noreg å knyta god kontakt med Kommisjonen og drøfta aktuelle næringspolitiske spørsmål med EU, seier Eriksen.

Verheugen la vekt på at Barentshavet truleg kjem til å verta den viktigaste kjelda for gassleveransar til EU i framtida. Han sa også at EU støttar dei norske forsøka på å gjera Hydro og Statoil til partnarar på Stockman-utbygginga i Barentshavet.

Melkøya-anlegget ved Hammerfest er Europas første anlegg for utskiping av flytande naturgass (LNG). Dette er det største industriprosjektet i Nord-Noreg nokon gong, og i 2007 skal den første gassen frå Snøhvit-feltet takast i land. Naturgass går over til flytande form når han vert kjølt ned til 163 minusgrader, og det er denne prosessen som skal skje på Melkøya. Statoil er operatør for Snøhvit-feltet.

- Dette er ein god anledning til å visa fram noko av det aller beste av norsk næringsliv. Samtidig får me presentert regjeringas nordområdesatsing for ein interessert europeisk partner, seier Eriksen.

Tysdag 23. mai deltar Verheugen på eit seminar om innovasjon på Handelshøyskolen BI i Oslo, saman med statssekretær Karin Yrvin. Same dag møter han student- og ungdomsbedrifter, i regi av Ungt Entreprenørskap. Møtet foregår i lokala til Nordea på Majorstuen. Statssekretær Frode Berge deltar også.

Odd Eriksen og Günter Verheugen på Melkøya.


23. mai 2006