Internasjonalt ekspertmøte om forenkling

Denne veka var representantar frå heile Europa samla i Oslo for å diskutera forenkling for næringslivet. Korleis skal ein på ein best mogleg måte finna tiltak som bidrar til konkrete forenklingar for bedriftene? Noreg har kome langt i dette arbeidet.

Regjeringa har nyleg vedteke å setja i gang eit omfattande prosjekt for kartlegging og forenkling av regelverket, slik at bedriftene sine kostnader ved å følgja regelverket kan kuttast. Kartlegginga vert gjort ved hjelp av den såkalla standardkostnadsmodellen, ein modell utvikla i Nederland. Metoden gjev detaljert informasjon om kva arbeidsoperasjonar bedriftene må utføra for å leva opp til krav frå styresmaktene. På denne måten kan ein finna fram til treffsikre forenklingstiltak.

Noreg er blant dei landa som først tok metoden i bruk, og Nærings- og handelsdepartementet har allereie fått gjennomført kartlegging av tre regelverksområde. No skal enda fleire regelverksområde kartleggjast.

- Alt regelverket som vedgår bedriftene skal vurderast for å finna gode forenklingstiltak, seier nærings- og handelsminister Odd Eriksen. - Me tek sikte på at sjølve kartlegginga skal vera ferdig i løpet av hausten 2007, og så skal me gjera det me kan for å gjennomføra forenklingstiltak som betyr noko for bedriftene.

ØRepresentantar frå Noreg, Nederland, Danmark, Sverige, Storbritannia, Ungarn, Polen, Frankrike, Tsjekkia og Austerrike deltok på møtet i Oslo. OECD deltok som observatør. Alle deltakarlanda kartlegg bedriftenes administrative kostnader ved hjelp av standardkostnadsmodellen.

Les mer om deltakerne i nettverket og hva som er gjort i de ulike landene: www.administrative-burdens.com

5. mai 2006