Ny teleavtale mellom Sør-Korea og Noreg

Nærings- og handelsminister Dag Terje Andersen signerte i dag ein ny teleavtale mellom Sør-Korea og Noreg. Andersen signerte avtalen på vegner av samferdsleministeren. Avtalen tek sikte på å fremja nærare samarbeid og utveksling av informasjon på kommunikasjonsområdet.

Avtalen (Memorandum of Understanding) tek blant anna for seg samarbeid på IKT-området. Avtalen omfattar breiband, tekniske standarder og sertifiseringar, i tillegg til internettapplikasjonar for e-helse og utdanning.

I 2002 vart det inngått ein fem år lang avtale mellom Sør-Korea og Noreg på teleområdet. I avtalen vart det identifisert fleire område av felles interesse, blant anna telekom-politikk, spektrums-forvaltning og teknologiutvikling. Statssekretær Steinulf Tungesvik besøkte Sør-Korea i 2006, og tok då initiativ til ein ny avtale. Avtalen som no er signert, er meir omfattande enn avtalen frå 2002.

Eit punkt om ein samarbeidskomité er no utvida til også å peika ut ein ansvarleg hjå kvar part, som skal organisera komiteen og medverka til effektivt samarbeid.

Nærings- og handelministeren Dag Terje Andersen og nærare 100 representantar for norsk næringsliv deltar på Kronprinsparets offisielle besøk til Sør-Korea. Næringslivssamarbeid er eit sentralt tema for besøket.

 

Bildetekst: Nærings- og handelsminister Dag Terje Andersen og statsråd Roh Jun-Hyong frå det sørkoreanske kommunikasjonsdepartementet signerer avtalen.