20 millionar til maritim utvikling
Historisk arkiv
Publisert under: Regjeringen Stoltenberg II
Utgjevar: Nærings- og handelsdepartementet
Pressemelding | Dato: 06.07.2006 | Sist oppdatert: 05.10.2006
Regjeringa har i 2006 løyvd 20 millionar kroner til ei ordning som skal fremja nyskaping i dei maritime næringane. Ordninga er no godkjend av EFTAs overvakingsorgan ESA og bedrifter kan truleg søkja om støtte allereie frå slutten av august.
Pressemelding
Nr.: 53/06
Dato: 6. juli 2006
Kontaktperson: Informasjonsrådgjevar Arvid Samland, tlf. 22
24 65 60
20 millionar til maritim utvikling
Regjeringa har i 2006 løyvd 20 millionar kroner til ei ordning som skal fremja nyskaping i dei maritime næringane. Ordninga er no godkjend av EFTAs overvakingsorgan ESA og bedrifter kan truleg søkja om støtte allereie frå slutten av august.
- Eg er glad for at den nye ordninga no er godkjent. Ordninga skal bidra til å utvikla Noreg som ein av dei fremste maritime nasjonane i verda, gjennom auka maritim verdiskaping. Støtte kan bli gitt til verft, utstyrsleverandørar, reiarlag og forskings-, teneste- og konsulentmiljø, seier nærings- og handelsminister Odd Eriksen.
Ordninga for maritim utvikling rettar seg mot:
- Prosjekt som tar sikte på å utvikla nye, lønnsame og konkurransedyktige produkt, tenester, produksjonsmetodar og marknader.
- Prosjekt som tar sikte på å styrkja innovasjonsevna i dei maritime næringane, gjennom auka samarbeid mellom bedrifter, kunnskapsmiljø og styresmakter.
Ordninga vert administrert av Innovasjon Norge, og vert ein viktig del av MARUT-initiativet (MARitim UTvikling). MARUT er ei omfattande satsing på forsking og innovasjon i dei maritime næringane. Samspelet mellom Innovasjon Norge, Noregs forskingsråd og næringane står sentralt, og dei to organisasjonane har inngått ein maritim samarbeidsavtale.
- For å styrkja og vidareutvikla norsk næringsliv må vi satsa på næringar der vi er spesielt gode. Maritim næring er ei av desse. Regjeringa ønskjer å leggja best mogeleg til rette for å vidareutvikle maritim næring, slik at Noreg også i framtida kan vera ein av dei leiande maritime nasjonane i verda, seier Eriksen.