Pressemelding

Nr.: 22/06
Dato: 28. mars 2006
Kontaktperson: Informasjonsrådgjevar Arvid Samland, tel. 22 24 65 60

Forvaltarmiljø for landsdekkjande såkornfond peika ut

Innovasjon Norge har peika ut Anker Management AS i Stavanger, Brisinga Management AS i Bergen og Såkorn Management AS i Trondheim til å forvalta dei landsdekkjande såkornfonda i dei tre byane. Fonda skal bidra til å få fram nyskapande prosjekt, ved at privat kapital og kompetanse vert tilført til prosjekt i tidleg fase.

– Me har no tatt eit stort steg i retning av å setja den landsdekkjande såkornordninga i drift, seier nærings- og handelsminister Odd Eriksen. – Det som no må gjerast er å få inn privat kapital, slik at fonda kan verta operative. Eg reknar med at dei første investeringane kan verta gjort i løpet av 2006.

Dei viktigaste kriteria for valet av forvaltarmiljø har vore kompetanse innan kapitalforvalting, bransjekunnskap og gode nettverk blant investorar og prosjekteigarar. Såkorninvesteringar har høg risiko, og det er heilt avgjerande for resultatet at fonda vert forvalta på ein profesjonell måte.

– Ved å finansiera nye, lovande prosjekt vil såkornfonda bidra til auka nyskaping, seier Eriksen. – Me skaper på denne måten eit breiare grunnlag for morgondagens vekst og velstand.

Dei landsdekkjande såkornfonda skal i ein tidleg fase gå inn i innovative prosjekt med stort vekstpotensial. Fonda vert lokalisert i universitetsbyane Oslo, Bergen, Trondheim og Stavanger. Dette vert gjort for å sikra nærleik til forskingsinstitusjonane, men fonda skal investera i prosjekt uavhengig av geografi. Ordninga avlastar risikoen for private investorar gjennom tapsfond og gunstig rente. Staten bidrar med 167 millionar kroner i lån, med eit tilhøyrande tapsfond på 25 % i kvart fond. Renta er på 12 mnd. NIBOR + 2 prosentpoeng. Det er eit krav at private investorar går inn med 167 millionar kroner i kvart fond. EFTAs overvakingsorgan ESA godkjende dei endelege vilkåra for fonda 8. mars 2006.

Kontaktperson i Innovasjon Norge: Spesialrådgjevar Stein Jodal, tel. 90 74 11 20.