Kinesisk visestatsminister positiv til frihandel med EFTA
Historisk arkiv
Publisert under: Regjeringen Stoltenberg II
Utgjevar: Nærings- og handelsdepartementet
Pressemelding | Dato: 27.09.2006 | Sist oppdatert: 29.10.2006
Nærings- og handelsminister Odd Eriksen hadde i dag politiske samtalar med den kinesiske visestatsministeren Zeng Peiyan. Ein eventuell frihandelsavtale mellom Kina og EFTA-landa var eit sentralt tema. Den kinesiske visestatsministeren kom med positive signal til ein slik avtale.
Pressemelding
Nr.: 71/06
Dato: 27. september 2006
Kontaktperson: Informasjonsrådgjevar Arvid Samland, tel. 22
24 65 60
Kinesisk visestatsminister positiv til frihandel med EFTA
Nærings- og handelsminister Odd Eriksen hadde i dag politiske samtalar med den kinesiske visestatsministeren Zeng Peiyan. Ein eventuell frihandelsavtale mellom Kina og EFTA-landa var eit sentralt tema. Den kinesiske visestatsministeren kom med positive signal til ein slik avtale.
– Regjeringa prioriterer å få til ein frihandelsavtale med Kina. Det vil opna for betre marknadstilgang og auka eksport for norske bedrifter, seier Eriksen.
Kinas visestatsminister Zeng Peiyan og nærings- og
handelsminister Odd Eriksen.
I september har det vore hyppig kontakt på høgt politisk nivå mellom Noreg og Kina. I tillegg til visestatsminister Zeng Peiyans besøk, var den kinesiske handelsministeren Bo Xilai i Noreg i sist veke, som den første kinesiske handelsministeren nokon gong. Sist veke var statssekretær Karin Yrvin i Kina, der ho blant anna møtte viseminister Yu Guangzhou i det kinesiske handelsdepartementet. I alle politiske samtalar har Noreg fremja ønskjet om ein frihandelsavtale.
Kina er Noregs største handelspartnar i Asia. Første halvår 2006 eksporterte norske bedrifter varer til Kina for over 7 milliardar kroner. Det er ein auke på 200 % samanlikna med same periode i fjor. Handelen med Kina har historisk sett vore sentrert rundt maritim og marin sektor, men dette er i stadig utvikling.
– Kina har utvikla seg til ein betydeleg marknad for norsk sjømat, samtidig som næringssamarbeidet innan energi og miljø er i utvikling. Om lag 200 norske bedrifter har i dag aktivitetar i Kina, seier Eriksen.
Energi og miljø var også eit tema under visestatsminister Zeng Peiyans besøk. Olje- og energidepartementet og the National Development and Reform Commission (NDRC) underteikna i dag ein avtale om styrkt samarbeid om energieffektivisering og fornybar energi. Noreg har høg kompetanse på desse områda, samtidig som behovet i Kina veks. Både Noreg og Kina vil difor ha stor nytte av eit tettare samarbeid.
Bedrifter som Elkem, AkerKværner og SINTEF deltar allereie i eit prosjekt i regi av Innovasjon Norge i Beijing. Dette går ut på at norsk kompetanse på energi- og miljø-området vert kopla mot kinesiske prosjekt.
Visestatsminister Zeng Peiyan har også hatt politiske samtalar med statsministeren og finansministeren. Han har også møtt representantar for fleire norske bedrifter.