Pressemelding

Nr.: 06/07
Dato: 25. januar 2007
Kontaktperson: Kommunikasjonssjef Mette Fossum Beyer, tel. 95 06 00 52

Priv. til red.

Handlingsplan for elektroniske tenester til næringslivet

Fredag 26. januar vert regjeringas handlingsplan for elektroniske tenester til næringslivet lagt fram. Handlingsplanen inneheld konkrete mål for det vidare arbeidet, og vert presentert av statssekretær Frode Berge i Nærings- og handelsdepartementet.

Eit av måla er at alle relevante tenester retta mot næringslivet skal gjerast tilgjengelege i Altinn i løpet av 2008. For første gong vert det også presentert ei samla oversikt over kva tenester som finst i Altinn i dag, kva som kjem i løpet av 2007, og kva som er planlagt på lengre sikt.

Handlingsplanen konkretiserer og utfyller regjeringas prinsipp og ambisjonar om ei døgnopen elektronisk forvaltning, slik det er nedfelt i St.meld. nr. 17 om IKT i offentleg sektor (som vart lagt fram i desember).

Skattedirektør Svein Kristiansen, SSB-direktør Øystein Olsen, direktør Erik Fossum i Brønnøysundregistra og IKT-direktør Gunnar Horn i NAV deltar på arrangementet. Dei presenterer ei rekkje nye elektroniske tenester i Altinn.

Regjeringa vil at næringslivet skal bruka meir tid på produktivt arbeid, og mindre tid på rapportering til det offentlege. Etenester er i så måte eit viktig tiltak. Undersøkingar viser at 8 av 10 næringslivsleiarar er nøgde med Altinn. Dei svarer at bedrifta bruker mindre tid på offentleg skjemaarbeid ved bruk av Altinn.

Handlingsplanen vert lagt fram på Felix konferansesenter på Aker Brygge (Bryggetorget 3) fredag 26. januar kl. 13.00. Oppmøte/servering frå kl. 12.30.