Pressemelding

Nr.: 08/07
Dato: 26. januar 2007
Kontaktperson: Kommunikasjonssjef Mette Fossum Beyer, tel. 95 06 00 52

Klarare prioritering av etenester til næringslivet

Regjeringa vil prioritera klarare når det gjeld elektroniske tenester til næringslivet. I handlingsplanen som vert lagt fram i dag vert det for første gong presentert ei samla oversikt over kva tenester som finst i Altinn i dag, kva som kjem i løpet av 2007, og kva som er planlagt på lengre sikt.

– Eg ser på Altinn som det viktigaste verktøyet i arbeidet med å tilby næringslivet offentlege tenester på nett. Altinn skal difor utviklast vidare, seier nærings- og handelsminister Dag Terje Andersen.

Handlingsplanen for elektroniske tenester til næringslivet vert lagt fram fredag 26. januar. Handlingsplanen konkretiserer og utfyller regjeringas prinsipp og ambisjonar om ei døgnopen elektronisk forvaltning, slik det er nedfelt i St.meld. nr. 17 (2006-2007) om IKT i offentleg sektor (som vart lagt fram i desember).

I handlingsplanen vert det varsla ei klarare prioritering frå regjeringa si side. Dette vert gjort ved å satsa på dei tenestene som kan gje størst gevinstar for næringslivet og også for offentleg forvaltning.

– Me vil prioritera dei tenestene som er nyttigast, dei som gir størst gevinst for brukarane. Her vil me vidareføra det gode samarbeidet med næringsorganisasjonane, seier Andersen.

Alle relevante tenester retta mot næringslivet skal gjerast tilgjengelege i Altinn i løpet av 2008. For dei 15 mest brukte skjemaa er det eit mål at 75 prosent av innrapporteringa skal skje elektronisk i 2008. Det skal dessutan etablerast tenester på tvers av etatsgrenser, slik at arbeidet i bedriftene vert mest mogleg effektivt. Tenestene skal utviklast slik at utfyllinga blir enkel for bedriftene, blant anna med felles brukargrensesnitt og førehandsutfylling av grunndata frå Einingsregisteret.

Regjeringa vil at næringslivet skal bruka meir tid på produktivt arbeid, og mindre tid på rapportering til det offentlege. Etenester er i så måte eit viktig tiltak. Brukarundersøkingar viser at 8 av 10 næringslivsleiarar er nøgde med Altinn. Dei svarer at bedrifta bruker mindre tid på offentleg skjemaarbeid ved bruk av Altinn.

– Me vil at Noreg skal vera eit godt land å driva næringsverksemd i. Det er difor avgjerande at me lukkast med å forenkla og leggja til rette for næringslivet, seier Andersen.

Les heile handlingsplanen (pdf-versjon).