Milliardsatsing på nye idear og produkt

Regjeringa løyver over 1,1 milliardar kroner til Innovasjon Norge, ein auke på 69 millionar kroner. Den auka satsinga på næringsutvikling, innovasjon og internasjonalisering medverkar til å realisere fleire gode idear, skape framtidsretta arbeidsplassar og styrkje verdiskapinga i norsk næringsliv.

– Med dette legg me til rette for innovasjon og nyskaping i heile landet, spesielt på næringsområde der Noreg har kompetanse eller spesielle føresetnader, seier nærings- og handelsminister Dag Terje Andersen.

Nærings- og handelsdepartementet løyver i 2008 1 176,6 millionar kroner til Innovasjon Norge. Dette er ei vidareføring av regjeringa si sterke satsing på Innovasjon Norge dei to siste åra.

Satsing på entreprenørskap og små og mellomstore verksemder med internasjonale vekstambisjonar står sentralt i arbeidet til Innovasjon Norge. Dessutan vert det satsa på kvinnelege entreprenørar og utvikling av regionale klynger. Innovasjon Norge bidrar med finansiering, kompetanse, nettverk og rådgjeving.

Som ein del av regjeringas maritime strategi vert 25 millionar kroner av Innovasjon Norge-løyvinga øyremerkt miljøprosjekt i dei maritime næringane og utvikling av nærskipsfartsflåten.

Reiselivssatsinga i Innovasjon Norge får 215 millionar kroner i 2008, ein auke på 15 millionar kroner. For å bidra til utviklinga av ny teknologi vert sterke satsinga på forskings- og utviklingskontrakter vidareført med heile 250 millionar kroner i 2008.

Regjeringa opprettar samtidig eit nytt statleg investeringsfond med ein eigenkapital på 2,2 milliardar kroner. Fondet vert organisert som eit dotterselskap under Innovasjon Norge og vil vere eit godt supplement til Innovasjon Norges andre finansielle verkemiddel.

Sjå også St.prp. nr. 1 frå Nærings- og handelsdepartementet kap. 2421.