Næringslivet brukar mindre tid på statlege skjema

Norsk næringsliv vart i 2006 spart for 98 årsverk i statleg byråkrati. Dette viser at arbeidet med å redusere næringslivets administrative byrder gir resultat. Nærings- og handelsminister Dag Terje Andersen presenterte dei ferske tala på eit møte med næringsorganisasjonane fredag.

– Vår ambisjon er at forenklingsarbeidet skal gi ein kostnadsreduksjon som merkast i bedriftene. På to år har det vore ein reduksjon på nesten 700 årsverk relatert til statlege skjema, seier nærings- og handelsminister Dag Terje Andersen.

Det aller meste av reduksjonen i 2006 kjem av overgang til elektronisk utfylling og innsending, og er knytt til bruk av Altinn-portalen. Altinn er det viktigaste verktyet i arbeidet med å tilby næringslivet offentlege tenester på nett.

9 etatar har meldt om forenklings- og samordningstiltak med positive effekt i 2006; Aetat og Rikstrygdeverket (no NAV), Direktoratet for arbeidstilsynet, Fiskeridirektoratet, Kredittilsynet, Skattedirektoratet, Sosial- og helsedirektoratet, Skipsregistra og Statistisk sentralbyrå.

– Dette gir inspirasjon til vidare satsing på forenkling, men resultata viser samtidig at det er potensial for ytterligare reduksjon, seier Andersen.

I 2005 og 2006 var det totalt ein reduksjon på 679 årsverk. Den store nedgangen i 2005 kom i hovudsak av fleire års arbeid med overgang til elektronisk utfylling av sjølvmeldinga til Skatteetaten.

Utvikling i næringslivets skjemabelastning:

	1998	1999	2000	2001	2002	2003	2004	2005	2006
Nye registrerte oppgåveplikter i perioden	60,4	11,3	16,3	1,8	2,7	8,8	30,6	4,1	2,3
Samordnings- og forenklingstiltak i perioden	-12,5	-15,6	-32,0	-65,5	-90,4	-52,0	-78,3	-585,0	-100,6
Netto endring (årsverk)	47,9	- 4,3	- 15,7	- 63,8	- 87,7	- 43,2	- 47,7	- 580,9	98,3

 

 

 

 

 

 

(Kilde: Oppgåveregisteret)