RNB 2006: Auka løyvingar til sikringstiltak i Sogn og Fjordane etter flaumane hausten 2005

Regjeringa foreslår i revidert nasjonalbudsjett å løyve totalt 57 millionar kroner til førebyggande sikringstiltak. Løyvinga skjer som følgje av skadeflaumane på Vestlandet og i Trøndelag hausten 2005 og vinteren 2006. Om lag halvparten av løyvinga vil bli fordelt til Vestlandet. I Sogn og Fjordane skal det gjennomførast sikringstiltak i seks kommunar for å hindre framtidige flaumskadar på bygningar og annan infrastruktur.

I Sogn og Fjordane var det særleg den ekstreme nedbøren den 14. november som førte til store skadar. Skadane i denne flaumen blei så store mellom anna fordi skadane ved ein flaum 14. august ikkje hadde blitt utbetra

- Regjeringa prioriterer tryggleik for liv, helse og viktig infrastruktur langs vassdraga, seier olje- og energiminister Odd Roger Enoksen. - Dette er samtidig med på å sikre busettinga i distrikta.

Ved intens nedbør over kortare tidsrom er det særleg mindre vassdrag som får kortvarige og kraftige flaumar. Flaumane kan vere dramatiske for dei som bur i nærleiken.

I sentrum av Leikanger blei store delar av elvekanten av Njøselvi graven bort på stutt tid. Sentrumsområdet er særs utsett for nye flaumar. Elevkanten skal difor sikrast for å trygge området. Tilsvarande sikring av sentrumsområdet skal skje i Kaupanger i Sogndal kommune etter flaum i Kaupangerelvi.

I Førde, Lærdal og Balestrand kommunar skal fleire bustadhus sikrast mot flaumskred. I Aurland kommune skjedde det skadar på eit eldre sikringstiltak som no skal utbetrast.

Meir om revidert nasjonalbudsjett 2006.