Luftfartsavgifter ned sju prosent frå 1. januar 2006

- Eg er glad for at vi no kan redusere avgiftene for luftfarten med nær sju prosent. No er det opp til flyselskapa å sørgje for at avgiftsreduksjonen kjem passasjerane til gode.

Dette seier samferdselsminister Liv Signe Navarsete i samband med at Samferdselsdepartementet har bestemt at luftfartsavgiftene skal reduserast med 4,3 prosent frå 1. januar 2006. Tek ein omsyn til ein forventa prisauke på 2,2 prosent neste år, betyr dette at avgiftane reelt sett kjem til å gå ned med nær sju prosent. Samferdselsdepartementet bestemmer prisane Avinor skal ta frå flyselskapa gjennom fastsettinga av takstregulativet til Avinor.

Avgiftsreduksjonen heng saman med veksten i talet på flypassasjerar og reduserte kostnader i Avinor som følgje av omstilling.

- Avinor går godt økonomisk. Innsatsen frå dei tilsette og leiinga i Avinor bidreg no til avgiftsreduksjonen, seier samferdselsminister Liv Signe Navarsete.

Til redaksjonen:

For meir informasjon, sjå "Forskrift om avgifter vedrørende statens luftfartsanlegg og -tjenester (takstregulativet)" (pdf)