Samferdselsminister Liv Signe Navarsete om: Lysaker stasjon

-Eg har tillit til at Jernbaneverket syter for at den nye Lysaker jernbanestasjon oppfyller krav som gir alle grupper av reisande eit sikkert og godt tilgjengeleg reisetilbod. Når den nye stasjonen står ferdig skal trafikantane få eit tilbod som er langt betre enn dei har i dag.

Dette seier samferdselsminister Liv Signe Navarsete i samband med at Jernbaneverket no har sendt eit brev til Samferdelsdepartementet med orientering om status for arbeidet med Lysaker stasjon på Drammenbanen.

- Eg kjem til å følgje denne saka nøye i tida framover, i nær kontakt med Jernbaneverket og dei to togselskapa NSB AS og Flytoget AS. I tillegg skal Statens jernbanetilsyn godkjenne utforming og bruk av stasjonen, seier samferdselsministeren.

Samferdselsdepartementet har bedt Jernbaneverket om å vurdere kva for tiltak som er aktuelle for å bøte på problem som har samanheng med avstanden mellom perrongkanten og toget. Jernbaneverket har no utarbeidd nye planar med endringar i utforming av stasjonen, slik at problema blir vesentleg mindre. I tillegg gjer Jernbaneverket mellom anna framlegg om å setje opp ei rist under perrongkanten.

Ifølgje Jernbaneverket vil desse tiltaka, samla sett, føre til at alle typar persontogtrafikk ved Lysaker stasjon oppfyller dei krav som gjeld for sikker og godt tilgjengeleg togtransport.

Med gjennomføring av desse tiltaka vil tidsplanen for utbygging av Lysaker stasjon og jernbanen i ”Vestkorridoren” halde, går det fram av brev frå Jernbaneverket.

Til redaksjonen:

For nærmare opplysningar - sjå:

Brev av 31. august 2006 frå Jernbaneverket til Samferdselsdepartementet

Vedlegg til brevet

Vedlegg 1

Brev av 21. desember 2005 frå Samferdselsdepartementet til Jernbaneverket

Her kan du lese tidlegare saker om Lysaker stasjon