Transportsektoren: Betre kvalitetssikring i tidleg fase i planlegginga

- Eg ønskjer enda betre styring og høgare kvalitet når det gjeld planlegging av store transportprosjekt. For å få til dette skal det no takast i bruk eit nytt system for kvalitetssikring i den tidlege fasen i planlegginga av store prosjekt, opplyser samferdselsminister Liv Signe Navarsete.

Ordninga med ”ekstern kvalitetssikring i tidleg fase” har fått nemninga ”KS1” og gjeld for alle statlege investeringar over 500 millionar kroner, også for investeringar utanfor transportsektoren. Ordninga med ”KS1” vart lagt fram for Stortinget hausten 2004, i samband med handsaminga av statsbudsjettet for 2005.

”KS1” skal takast i bruk i transportsektoren i samband med arbeidet med den komande stortingsmeldinga om Nasjonal transportplan (NTP) for perioden 2010 – 2019. Samferdselsdepartementet sender no ut retningsliner til Statens vegvesen og Jernbaneverket om korleis ”KS1” skal handterast i arbeidet med Nasjonal transportplan. Fylkeskommunane får samtidig ei orientering om retningslinene.

Føremålet med ”KS1” er å sikre betre statleg styring med planlegginga, slik at ressursane til planlegging blir sette inn der det er mest behov for å gjennomføre tiltak. Ordninga med ”KS1” skal sikre at dei mest relevante alternativa blir utgreidde. Gjennom ”KS1” vil prosjektplanlegginga bli sett inn i ei meir overordna og strategisk ramme. - Prioriteringa mellom ulike prosjekt vil, som tidlegare, skje gjennom Nasjonal transportplan og dei årlege budsjetta. ”KS1” skal gjennomførast innanfor rammene av gjeldande regelverk og ansvarsdeling mellom forvaltningsnivå, seier samferdselsministeren.

Som hovudregel skal det gjennomførast ”KS1” for alle prosjekt som skal omtalast i den komande stortingsmeldinga om Nasjonal transportplan 2010 – 2019 og som har ein kostnad over 500 millionar kroner. For somme prosjekt er ein alt komme langt i planlegginga. I ein overgangsperiode vil ein difor ha ei smidig praktisering av hovudregelen om bruk av ”KS1”, og det vil bli gjort unntak for ein del prosjekt. Når systemet for kvalitetssikring er fullt ut sett i verk, vil kvalitetssikringa skje før ein tar til med ”alternativ utgreiing etter plan- og bygningsloven”. Vedtak i regjeringa om vidare planlegging vil så leggje rammene for planlegging etter plan- og bygningsloven.

Samferdselsdepartementet vil ved utgangen av 2006 syte for at Statens vegvesen og Jernbaneverket får meir detaljerte retningsliner om arbeidet med ”KS1”.

Til redaksjonen

For nærmare opplysningar – sjå:

Brev av 11.09.06 frå Samferdselsdepartementet til Statens vegvesen Vegdirektoratet og Jernbaneverket.

Vedlegget "Supplerende retningslinjer for Statens vegvesen og Jernbaneverket om forholdet mellom Nasjonal transportplan og KS1 (kvalitetssikring i tidlig fase)."
Vedlegget omfattar mellom anna ei opplisting av prosjekt som skal gjennomføre "KS1" og ein del andre prosjekt som er komne langt i planlegginga og som difor får unntak for "KS1".

Brev av 11.09.06 frå Samferdselsdepartementet til fylkeskommunane og Kommunenes sentralforbund (KS).