Samferdselsminister Liv Signe Navarsete: Vil greie ut Haukelibane og fleire strekningar for høgfartstog

Samferdselsminister Liv Signe Navarsete går vidare med utgreiingar om høgfartstog.

- Eg har tillit til at konsulentselskapet gjer eit godt arbeid med utgreiingane, og legg til grunn deira råd om å greie ut strekninga Oslo – Trondheim og Oslo – Göteborg. I tillegg er det heilt naudsynt også å få utgreidd samband mellom Oslo og Bergen/Stavanger, seier Navarsete.

Difor får Jernbaneverket i dag melding om å utvide det tyske konsulentselskapet VWI sitt oppdrag. Alle relevante moglegheiter for å betene marknadane i sørvest-Noreg skal analyserast. Dette inkluderer Haukelibanen, den sørnorske høgfartsringen og i tillegg andre moglege alternativ.

Samferdselsministeren ser det som svært viktig at dei vidare utgreiingane skjer av same utgreiarar, med same og samanliknbart format og standard.

Utgreiingane blir ferdige på ulike tidspunkt utover i 2007. Den fyrste fasen av utgreiinga blei gjennomført hausten 2006. Den andre fasen skal vere ferdig i april i år og den tredje fasen i september. Om det er naudsynt vil det og bli gjort ein fjerde utgreiingsfase, der ein vel meir detaljerte studiar av eit eller fleire traséalternativ. Om ein vel å gå vidare med ein slik fjerde fase, må det lysast ut til ein ny anbodskonkurranse fordi dette arbeidet blir større og meir kostbart.

Konsulentselskapet skal analysere etterspurnad, infrastruktur, driftskostnadar og driftskonsept for dei ulike strekningane og delstrekningane. Dette vil vise effekten av høgfartstog på fleire delstrekningar, i tillegg til ei heilskapleg løysing. Ved å sjå på ulike kombinasjonar skal ein utgreie den beste løysinga for eit eventuelt høgfartsnett i sørvest-Noreg.