Karmøy blir ein del av Haugalandspakka

- Bompengeordninga for utbygging av vegprosjekta i Haugalandspakka i Rogaland og Hordaland skal utvidast til å omfatte prosjekt og tiltak i Karmøy kommune i Rogaland. Ei slik utviding er i tråd med vedtak i Karmøy kommune og Rogaland fylkeskommune. Utbygginga av prosjekta i Haugalandspakka vil føre til meir effektiv og miljøvenleg transport og færre trafikkulykker. Tiltak for å styrkje kollektivtransporten og nye gang- og sykkelvegar er dessutan ein viktig del av Haugalandspakka.

Dette seier samferdselsminister Liv Signe Navarsete i samband med at det i statsråd i dag er lagt fram eit forslag om å utvide bompengeordninga for Haugalandspakka for å finansiere vegprosjekt og tiltak i Karmøy kommune.

Haugalandspakka omfattar i dag i hovudsak utbetringstiltak på E134-strekninga Haugesund – Etne og fleire prosjekt på riksveg 47 Haugesund – Sveio. I tillegg er det lagt opp til å gjennomføre fleire investeringstiltak mellom Årsvågen og fylkesgrensa mot Hordaland.

Forslaget om å utvide Haugalandspakka omfattar ei rekkje utbetringstiltak, bygging av gang- og sykkelvegar og miljø- og trafikksikringstiltak på vegnettet i Karmøy kommune.

Finansieringa av Haugalandspakka byggjer på bompengar, statlege midlar og fylkeskommunale midlar. Den samla økonomiske ramma for utbygginga er om lag 2,7 milliardar kroner.

 

• For fleire opplysningar – sjå St.prp. nr. 45 (2007-2008) Om ein del saker på Samferdselsdepartementets område