1,4 milliardar kroner til asfaltdekke i 2009

- Tiltakspakka frå regjeringa gjer at det i 2009 vil bli brukt sju milliardar kroner meir på samferdsel enn i 2008. I tiltakspakka er det sett av 500 millionar kroner til asfaltlegging på riksvegnettet, medrekna utbetring av vegfundamentet. Til asfaltlegging skal det brukast 325 millionar kroner, medan 175 millionar kroner går til utbetringar i samband med asfaltarbeidet. Dette kjem i tillegg til over ein milliard kroner som alt ligg inne i vedteke statsbudsjett til asfaltarbeid. Regjeringa la fram tiltakspakka måndag 26. januar, og i dag er anboda for dette arbeidet utlyst. Det er raskt levert, seier samferdselsminister Liv Signe Navarsete.

Regjeringa har gjennom tiltakspakka lagt vekt på å velje treffsikre tiltak for å styrkje sysselsetjinga over heile landet. I tillegg har dette gjort det mogleg med eit krafttak for å betre transporten på veg og jernbane. 

- Dei 500 millionar kronene frå tiltakspakka til asfalt og naudsynte utbetringar av vegfundamentet vil gi om lag 640 kilometer nytt asfaltdekke. Midlane er fordelte med 100 millionar kroner på kvar av dei fem regionane til Statens vegvesen, seier samferdselsministeren.