Opning av nytt anlegg for infraraud avising- Gardermoen

Samferdselsminister Liv Signe Navarsete
Oslo lufthamn Gardermoen, 18. januar 2006

Først vil eg takk for invitasjonen til å opne dette anlegget for infraraud avising av fly her på Gardermoen.

Folk og næringsliv i heile Noreg skal ha tryggje og effektive flyrutetenester, med rask tilgang både til andre delar av landet og til utlandet. Norsk luftfart er no inne i ei god utvikling.

Samtidig er det viktig å ta innover oss dei store miljøutfordringane som er knytte til luftfarten. Luftfarten påverkar blant anna miljøet gjennom utslepp av drivhusgassar, lokale og regionale utslepp og utslepp av kjemiske middel. Og flytrafikken fører som kjent med seg ein del støyulemper.

Gardermoen har dei strengaste miljøkrava i verda for flyplassar. Det er derfor ekstra spennande at Gardermoen no som første flyplass i Europa skal prøve ut dette nye systemet for infraraud avising, ei løysing som er meir miljøvennleg enn dei metodane som hittil har blitt brukt til avising.

Avinor har gjennomført ei rekkje tiltak for å redusere utslepp av kjemikaliar på og rundt flyplassane, og det er streng regulering av slike utslepp. Infraraud avising kan vere eit viktig bidrag i arbeidet med å minske bruken av slike miljøskadelege kjemiske produkt ytterlegare.

Erfaringar frå USA viser at infraraud avising gir positive miljøgevinstar i form av redusert kjemikalforbruk. Eg har merka meg at ein reknar med at utsleppet til nærmiljøet på Gardermoen vil gå ned ved bruk av dette nye avisingsanlegget.

Prosjektet med dette nye avisingsanlegget er eit samarbeid mellom fleire aktørar. SAS Ground Services skal stå for drifta og utprøvinga. OSL har stilt areal til rådvelde og investert i infrastruktur, medan Radiant Services Europe har levert anlegget. I tillegg har Innovasjon Noreg gitt eit lån på 9 millionar kroner.

Dersom dette prøveprosjektet viser at denne avisingsmetoden er positiv miljømessig, økonomisk og operativt for norske forhold, så vil metoden bli teken i bruk kommersielt fleire stader i Europa. Dette kan i så fall vere med på å gi grobotn for nye norske arbeidsplassar.

Eg håper vi i tida framover får sjå fleire slike nyvinningar som er med på å minske dei miljømessige utfordringane som er knytte til luftfarten, og at samarbeidet mellom flyplassar, flyselskap og teknologibedrifter også i framtida skal gi resultat på dette området.

Til alle dei som har arbeidd med forsking og utvikling på dette området og til alle som har medverka til planlegging, utforming og oppføring av dette anlegget vil eg seie:

Takk for innsatsen og velgjort arbeid – og lukke til vidare på dette viktige feltet.

Med dette har eg så gleda av å erklære det nye og miljøvennlege avisingsprosjektet ved OSL som opna.