Norsk arbeidsliv treng betre vegar

Ved å oppfylle Nasjonal transportplan på vegsektoren reduserer regjeringa samfunnets transportkostnader betydeleg og styrkjer grunnlaget for sysselsetjing og næringsaktivitet i mange distrikt og næringar.

Sidan vi tok over hausten 2005 har regjeringa styrkt samferdslebudsjettet med om lag 3 milliardar kroner i forhold til regjeringa Bondevik (som oppnådde budsjettforlik med Frp på dette nivået i førre periode) sitt budsjettframlegg for 2006. Dette er ein auke med meir enn 15 prosent. Regjeringa gjer det fordi vi ønskjer å byggje ut offentleg velferd og infrastruktur i staden for å tildele skattelette til dei rikaste.

Auka budsjett og historisk oppfylling av måla i Nasjonal transportplan (NTP) har gjort det ”lov” å diskutera seriøst dei store utfordringane Noreg har på vegsektoren. Eg set stor pris på at vi no har ein levande debatt, bl.a. om kvar behova er aller størst. Regjeringa har store utfordringar å aksla både med å levera i dei komande statsbudsjetta og ikkje minst i den nye NTP, som skal leggjast fram i slutten av 2008.

Utover å oppfylle rammene sette i NTP, har regjeringa prioritert ein vesentleg auke i vegvedlikehaldet. Etter mange års reelle kutt i budsjettprosessane på denne posten stod det verkeleg dårleg til. Statens vegvesen har berekna at dette har ført til at det  trengst 14 milliardar kr for å få riksvegane opp på god standard. Det er dyrt å spare seg til fant! Regjeringa har stansa veksten i dette etterslepet, og vi vil utarbeide ein plan for å byggje det ned.

Prioriteringa i inneverande NTP vektlegg hovudvegane på Austlandet. Dei er viktige for næringstransporten i heile landet. Noreg er spesielt ved at industri- og vareproduksjonen vår skjer svært spreidd. Altfor mange transportarbeidarar slit på farlege, dårlege og smale vegar i distrikta. I neste periode er det viktig for oss å kombinere måla om betre framkomst, meir miljøvenleg transport og betre trafikktryggleik.

Då er det naudsynt å vri midlar utover i landet. Ein fersk rapport frå SINTEF om miljøkonsekvensar av vegbygging viser at effektar i form av mindre forbruk og utslepp oppnår ein ved å retta ut svingar, utvida vegen og minska stigningar på vegnettet i distrikta – der det uansett ikkje er eit godt kollektivtilbod som personbilen kan ta passasjerar frå.

Regjeringa satsar på å flytte mest mogleg gods frå veg til sjø og bane, men i Noreg vil vegen vere viktigaste transportåra. Ei sunn utvikling av vegsektoren vil vere viktig for å styrkje konkurranseevna og arbeidsplassane – i industrien, i transport- og anleggsbransjen, og slik motverke sentralisering og styrke næringsutvikling i distrikta.