Opning av ”Sykle til jobben 2007”

Opning av ”Sykle til jobben 2007”
Oslo 3. mai 2007

Gode sykkelvener, 

Takk for innbydinga til å vere ambassadør for ”Sykle til jobben 2007”.

- I ein travel og hektisk kvardag blir dessverre trening og fysisk aktivitet altfor ofte prioritert bort. I tillegg har meir og meir av arbeids- og kvardagen blitt stillesitjande.  Dette får uheldige helsemessige følgjer, for den enkelte og for heile samfunnet. Tar vi beina fatt – i staden for å køyre av garde med bil – så er vi med på å førebyggje helseskadar. Dessutan: Vi er med på å redusere offentlege og samfunnsmessige helsekostnader, og vi kan attpåtil kome i enda betre fysisk form. Ja, det er sanneleg mange som og blir i godt humør av å sykle. Med andre ord: ein vinn- vinn- situasjon!

Hugs: Det er helse i kvart tråkk, det gjer godt for kropp og sinn!
Men gløym for all del ikkje å bruke sykkelhjelm. Statens vegvesen har i desse dagar sett i gong ein haldningskampanje for å få fleire til å bruke sykkelhjelm. Kampanjen vil vere synleg utover heile landet både i form av annonsar og ved ullike sykkelarrangement.

- Regjeringa kan ikkje vedta at no skal "alle" sykle til jobben. Men vi kan, saman med Statens vegvesen, fylkeskommunar og kommunar, arbeide for å leggje  fysisk til rette for at fleire skal bli freista til å sykle. Regjeringa er opptatt av sykkel, og vi ønskjer å leggje til rette for så mange som mogleg kan gå og bruke sykkelen trygt. For å greie dette må det løyvast midlar, og eg kan love at eg skal arbeide hardt får å få mest mogeleg midlar til gang og sykkelvegar i dei nærmaste åra. Over årets budsjett blir det brukt 310 millionar kronar til gang- og sykkelvegar, 70 millionar av desse midlane er bompengar. Dei to neste åra vil regjeringa sørgje for ei vesentleg auke i løyvingane til gang- og sykkelvegar.

- Etter at eg i fjor var ambassadør for aksjonene i fjor, fekk eg enda ei påminning om å kjøpe meg ein sykkel til bruk her i Oslo. Som tenkt, så gjort, og no har eg ein sykkel også i hovudstaden. Han blir nok ikkje brukt så ofte som eg ønskjer, men eg prøver å bruke han med jamne mellomrom.

- I dag er det sterkt fokus på klimautfordringane, heime og ute i den store verda. Det er liten tvil om at endringane vi ser i klimaet er skapte av menneske, sjølv om somme synest å meine noko anna.

Vi må ta i bruk fleire verkemiddel for å prøve å snu denne utviklinga. Vi må sjå på alle moglege tiltak. Eit tiltak er å leggje til rette for andre transportmiddel enn bil.

Her kjem sykkelen inn, eit transportmidel som bør spele ei viktigare rolle. I arbeidet med den sektorpolitiske klimahandlingsplanen er eg overraska over kor stor gevinst vi kan få ved å bygge gang- og sykkelvegar. Mitt mål er at fleire skal bruke sykkelen på korte turar. Ved å ta i bruk sykkelen til og frå arbeid får ein gode vanar. Det kan truleg bli meir naturleg å bruke sykkelen til butikken og andre gjeremål, når ein først har fått vanen med å sykle til arbeid. Å bruke sykkelen til og frå jobb er med på å skape gode haldningar, både hos ein sjølv, og overfor familie, vener og arbeidskollegaer.

Så til alle som er ansvarleg for planlegging og gjennomføring av aksjonen: Takk for sterkt engasjement og nyttig arbeid.

- Til slutt: Eg vil oppmode alle som deltar i aksjonen i år til å sykle varsamt. Tenkt godt om og ver grei mot medtrafikantar – og ”God tur” til dykk alle!