Store ord og lite att

Innlegg inntatt i Bergens Tidende, 13. juli 2007.

Senterpartiet vil bygge landet. Vi prioriterer fellesskapsløysingar framfor skattelette. Den førre regjeringa sine prioriteringar innebar at folk køyrde med stadig finare bilar på stadig dårlegare vegar. Veg og ferje samt jernbane og kollektivtrafikk er viktig for at samfunnet skal fungere, for at næringslivet skal fungere og for at folk skal kunne busetje seg kring i landet. Derfor har den nye regjeringa satsa på samferdsle.

Frp angrip oss for manglande samsvar mellom liv og lære. Men vi følgjer opp det vi lova. Det gjer derimot ikkje Frp. Frp er store i ord og dårlege på resultat. På punkt etter punkt kan det dokumenterast at det ikkje er samsvar mellom liv og lære i Frp i vegpolitikken.

Små vegbudsjett

Frp inngjekk forlik med Bondevik II-regjeringa i 3 av 4 statsbudsjett i siste periode. Det var ikkje samferdsle Frp prioriterte høgast. I desse 3 budsjetta vart innsatsen innanfor samferdsle auka med 441 mill kr. Midlane til drift og vedlikehald av riksvegar vart auka med 1 mill kr (!) i desse 3 budsjettforlika. Den raud-grøne regjeringa med føreslo hausten 2005 ein auke på 463 mill på samferdsleområdet. Sp gjorde meir i løpet av 3 veker enn Frp utretta i Stortinget på 3 år.

Etter det tredje budsjettforliket mellom Frp og Bondevik II-regjeringa sa Siv Jensen i Stortinget 25.11.2004: ”Jeg er stolt over det vi har klart å oppnå”…..”Folk flest er fornøyd med resultatet.  Det er det grunn til å være stolt av”.

Høge bilavgifter

Frp prioriterte heller ikkje reduksjonar i bilavgiftene i dei budsjettforlika dei inngjekk i perioden 2001-2005. Sjølv om ein ser på Frp sine eigne alternative budsjett som ikkje får fleirtal, tek partiet inn langt meir i bilavgifter enn dei brukar på investering, drift og vedlikehald av vegar. Frp føreslår slik i 2007 å ta inn over 19 mrd meir i bilavgifter enn dei brukar på veg. Her er det heller ikkje samsvar mellom liv og lære.

Meir bompengar

Frp sine store ord mot bompengar kjem også i eit underleg lys når vi ser på kva partiet gjer lokalt. Lokalt har Frp støtta bompengar i Austevoll og Os der partiet endåtil har ordføraren, og også i Oslo der partiet styrer og har byråden for samferdsle. På spørsmål om partileiinga var orientert om bompengeplanane i Oslo er Siv Jensen svært ullen, men seier at ”velgerne forstår at det må inngås kompromisser” (Aftenposten 17.03.07).

Regjeringa prioriterer

For 2007 har regjeringa gjennomført ei historisk satsing på både veg og jernbane. Ramma til vegformål er auka med 1,6 mrd til 15,2 mrd frå 2006 til 2007. Ramma til jernbaneformål er auka med over 1 mrd til 7,1 mrd.

Oppsummert kan det slåast fast at dersom Frp vert målt opp dei krav partiet stiller til andre, kan veljarane ikkje stole på Frp. Frp brukar ikkje bilavgiftene til samferdsle, Frp støttar bompengar der dei har makt og Frp gjorde mindre for samferdsle på 3 år enn dei raud-grøne partia gjorde på 3 veker. Der Frp pratar, handlar Senterpartiet.