Innlegg - anleggstart for E18 Melleby-Momarken

Kjære alle saman: Gratulerer med dagen!

Det er flott å kunna feira at arbeidet med Melleby-Momarken går i gang – til og med tidlegare enn planlagt!

Eg skal aldri gløyma den fredagsmorgonen i mai her på brakkeriggen då eg kunngjorde at no gav vi klarsignal for Melleby-Momarken. Eg såg at Statens vegvesen har kjensler: ekte glede, med applaus, ja, gledestårer.

Å få på plass ny Melleby-Momarken vil føra til tryggare, meir miljøvenleg og effektiv trafikk. 

E18 Ørje-Oslo er det viktigaste vegsambandet mellom Noreg og Sverige – nest etter E6 over Svinesund. Her på E18 passerer 20 prosent av all godstransport mellom Noreg og utlandet.

Ein moderne E18 gjennom Østfold er viktig for utanriks godstransport, for næringslivet sine transportkostnader og for utviklinga i fylket.

For regjeringa har det vore viktig å få til raskare og meir samanhengande utbygging av E18 Oslo-Ørje enn førre regjering la opp til i sin transportplan. E18 Ørje-Vinterbro består av totalt 70 kilometer ny vei. I fjor opna vi Krosby-Knapstad. I dag startar arbeida på Melleby-Momarken. Etter planen er vi i gang med Knapstad-Akershus grense i 2013.

Sidan 2005 har vi auka løyvingane til veg med nærare 50 prosent og til bane med over 70 prosent. 38 prosent av eksisterande motorveg er bygd i åra 2006-2011.

Vi arbeider no med ein ny Nasjonal transportplan. Vi har enno mykje ugjort! Min ambisjon er at vi skal ha eit moderne jernbane- og hovudvegnett på plass innan 20 år.

I går opna vi Dal-Minnesund – 19 nye km på E6 – og også 6,4 nye km på Rv7 ved Ramsrud overfor Hønefoss.  I dag feirar vi at Mellby-Momarken er i gang.

Lukke til – til Statens vegvesen, til entreprenørane og alle andre som no skal i gang med godt arbeid! Vi har alle grunn til å gleda oss over at det framleis er folk i Statens vegvesen og i bransjen som tåler skitt under støvlane!