Noreg går med i sekretariat for samarbeidet om Antarktis
Historisk arkiv
Publisert under: Regjeringen Stoltenberg II
Utgjevar: Utenriksdepartementet
Pressemelding | Dato: 12.05.2006 | Sist oppdatert: 05.10.2006
- Det er gledeleg at det viktige samarbeidet under Antarktistraktaten har fått eit permanent sekretariat, seier utanriksminister Jonas Gahr Støre i ein kommentar til at Regjeringa i dag legg fram forslag for Stortinget om norsk godkjenning av det nye sekretariatet i Buenos Aires. (12.05.06)
Pressemelding
Nr.: 59/06
Dato: 12.05.06
Noreg går med i sekretariat for samarbeidet om Antarktis
- Det er gledeleg at det viktige samarbeidet under Antarktistraktaten har fått eit permanent sekretariat, seier utanriksminister Jonas Gahr Støre i ein kommentar til at Regjeringa i dag legg fram forslag for Stortinget om norsk godkjenning av det nye sekretariatet i Buenos Aires. Utanriksministeren legg til at det er viktig for Noreg å støtte opp om det internasjonale samarbeidet i Antarktis og å sikre norsk medverknad i utviklinga på Sørpolkontinentet.
Det internasjonale samarbeidet om Antarktis er regulert av Antarktistraktaten av 1959, som Noreg ratifiserte året etter. På samrådsmøtet i 2003 lukkast det å nå fram til eit samrøystes vedtak om å skipa eit permanent sekretariat i Buenos Aires. Dette vedtaket er til no godkjend av 14 av dei 28 samrådspartane, og sekretariatet vart oppretta på mellombels grunnlag i 2004. Regjeringa ber i St.prp. nr. 62 (2005/2006), som vart godkjend i statsråd i dag, Stortinget om å samtykkje i opprettingsvedtaket.
I proposisjonen viser Regjeringa til at den norske verksemda i Antarktis både historisk og i dag er av monaleg omfang. Noreg har vore blant dei mest aktive i det internasjonale samarbeidet om Sørpolkontinentet. Dei norske interessene i Antarktis har auka dei siste åra. Såleis står norskregistrerte skip for ein firedel av den aukande turismen til kontinentet. Noreg er òg største fiskerinasjon i farvatna som vert forvalte av Kommisjonen for vern av antarktiske marine ressursar (CCAMLR). Det sterke norske engasjementet i Antarktis har fått uttrykk ved at det er oppretta ein heilårs norsk forskingsstasjon der, Troll-stasjonen, med tilknytt flystripe. På denne bakgrunnen er det naturleg at Noreg har vore ein pådrivar for å skipa eit permanent sekretariat som kan gje det internasjonale Antarktis-samarbeidet større kontinuitet.