Partane til våpenkvileavtalen på Sri Lanka, styresmaktene og dei tamilske tigrane (LTTE), har dei siste dagane vore involvert i farlige militære operasjonar, etter at LTTE har hindra vasstilførsel frå sitt kontrollerte område til styresmaktene sitt kontrollerte område. Situasjonen er fastlåst og kan lett medføre eskalering av den væpna konflikten. Kamphandlingane bryt med våpenkvileavtalen frå 2002.

- Noreg tilskundar umiddelbar stans i dei militære operasjonane frå begge sider for å skape forhandlingsklima og som gjer løysing av vass-spørsmålet mogleg. Tigrane må opne vasstilførsla for å hindre ytterlegare lidingar for uskuldige sivile og øydelagde avlingar – og partane sine militære styrkar må trekke seg tilbake til dei posisjonane dei hadde då dei inngjekk våpenkvileavtalen i 2002, seier utviklingsminister Erik Solheim.

Eskaleringa av konflikten kjem samstundes som den sivile observatørstyrken Sri Lanka Monitoring Mission (SLMM) har komme under press. LTTE vil ikkje lenger samarbeide med danske, finske og svenske monitorar etter at EU lista LTTE som ei terrorgruppe tidlegare i år. Spesialutsending Jon Hanssen-Bauer reiser på eit lenge planlagt besøk til Sri Lanka 3. august for samtalar med partane.

- Eg sender Hanssen-Bauer til Sri Lanka for å drøfte framtida for SLMM med begge partar. SLMM-observatørane frå Danmark, Finland, Island, Sverige og Noreg har gjort og gjer ein framifrå innsats i denne vanskelege tida. Deira arbeid har utvilsamt vore til avgjerande betyding for partane i å overhalde våpenkvileavtalen, seier utviklingsminister Solheim.

Pressekontakt under reisa: konsulent Sondre Bjotveit, mobil +47 98032070