Solheim besøkjer Nepal og India

Miljø- og utviklingsminister Erik Solheim reiser til Nepal og India i slutten av januar. 

Nepal er nå i ei avgjerande fase for å få i hamn ein lang og utmattande prosess mot varig fred. Noreg støttar framleis fredsprosessen. 

– Fredsprosessar er alltid kompliserte. Det tek tid å bli einige om ny struktur for ein stat, grunnlov og styringsform når tidligare fiendar må samarbeide. Nepal har kome veldig langt. No er landet inne i siste avgjerande fase, seier Solheim. 

Solheim skal mellom anna møte statsminister Baburam Bhattarai og leiarar for alle dei største politiske partia. Solheim vil òg fokusere på situasjonen for menneskerettane i Nepal, og Noreg si rolle i utviklinga av miljøvennleg vasskraft i landet. 

I India skal Solheim delta på konferansen Delhi Sustainable Development Summit. Han skal òg møte Indias miljø- og skogminister Jayanthi Natarajan og sjå på Noregs samarbeid med India på biologisk mangfald, berekraft og fornybar energi. 

Av omsyn til visum, ber ein presse som vil vere med på heile eller delar av reisa om å ta kontakt så snart som mogleg for meir praktisk informasjon. 

Pressekontakt: Kommunikasjonssjef Trond Viken, mobil 992 18 303 (med på reisa). Eventuelt pressevakta for utviklingssaker, telefon 913 95 000.

****

Pressemeldingar og nyhende om bistand og utvikling skal vere lett å lese. Solheims rådgiverar bruker Liks til å teste kor enkle tekstar er å lese. Denne pressemeldinga har ein verdi på 38. Det er det same som i skjønnlitteratur og vekeblad. Les meir om kampen for eit betre og klarare språk i staten hos Klarspråk.no.