Kommuneproposisjonen 2011 og revidert nasjonalbudsjett 2010
Rundskriv | Dato: 21.09.2010 | Kommunal- og distriktsdepartementet
Opphavleg utgjeve av: Kommunal- og regionaldepartementet
Nr: H-02/10
Kommunane
Fylkeskommunane
Fylkesmennene
Nr. H-02/10 Vår ref 10/120-19 Dato
Dette rundskrivet orienterer om Stortinget si handsaming av kommuneproposisjonen 2011 (Prop. 124 S (2009-2010)), jf. Innst. 345 S (2009-2010) frå Stortinget sin kommunal- og forvaltingskomité. Samstundes med kommuneproposisjonen la regjeringa fram revidert nasjonalbudsjett 2010 (Meld. St. 2 (2009-2010)) og forslag til løyvingsendringar for 2010 i Prop. 125 S (2009-2010), jf. Innst. 350 S (2009-2010). Stortinget fatta vedtak om desse sakene 16. og 18. juni 2010.
Innstillingane frå kommunal- og forvaltingskomiteen og finanskomiteen og referat frå stortingsdebattane 16. og 18. juni er tilgjengelege på Stortinget sine nettsider: www.stortinget.no.
1. Det økonomiske opplegget for kommunesektoren i 2011
Hovudtrekka i det økonomiske opplegget for kommunesektoren for 2011 er følgjande:
• Realvekst i kommunesektoren sine samla inntekter på mellom 4 og 5 milliardar kroner i 2011. Veksten er rekna frå anslått inntektsnivå i 2010 i revidert nasjonalbudsjett 2010.
• Realvekst i kommunesektoren sine frie inntekter i 2011 på mellom 2½ og 3 milliardar kroner.
• Av veksten i frie inntekter på mellom 2½ og 3 milliardar kroner skal 200 millionar kroner fordelast til fylkeskommunane, og resten skal fordelast til kommunane.
• Av veksten til kommunane skal 400 millionar kroner fordelast som ekstra skjønnsmidlar til dei kommunane som taper mest på omlegginga av inntektssystemet.
• Innlemming av øyremerka tilskot til barnehagar (driftstilskot til barnehagar, tilskot til tiltak for born med nedsett funksjonsevne i barnehage og skjønnsmidlar til barnehagane) i rammetilskotet til kommunane.
• Innlemming av øyremerka tilskot til krisesenter i rammetilskotet til kommunane.
• Innlemming av øyremerka tilskot til kvalifiseringsprogrammet i rammetilskotet til kommunane.
• Skjønnsramma for 2011 er fastsett til 2 504 millionar kroner i tråd med forslaget i kommuneproposisjonen.
Regjeringa legg fram endeleg framlegg til inntektsrammer for kommunesektoren i statsbudsjettet for 2011 (Prop. 1 S (2010-2011)).
2. Endringar i inntektssystemet for kommunane frå 2011
Hovudpunkta i endringane i inntektssystemet frå 2011 er:
• Ny kostnadsnøkkel for kommunane, inkludert delkostnadsnøkkel for barnehage.
• Skatteinntektene sin del av dei samla inntektene til kommunane vert redusert til 40 prosent.
• Inntektsutjamninga vert trappa opp frå 59 prosent i 2010 til 60 prosent i 2011.
• Satsane for småkommunetilskotet vert redusert med 1 million kroner.
• Satsane for Nord-Noreg- og Namdalstilskotet vert redusert med 10 prosent.
• Nytt storbytilskot til dei fire største byane; Oslo, Bergen, Trondheim og Stavanger.
• 400 millionar kroner av veksten i frie inntekter vert sett av til skjønnstilskotet, og skal fordelast til dei kommunane som taper mest på omlegginga av inntektssystemet. Det er Kommunal- og regionaldepartementet som skal fordele desse midlane.
For nærare detaljar om endringane i inntektssystemet vert det vist til kommuneproposisjonen og Innst. 345 S.
3. Endringar i rammetilskotet til kommunar i 2010 (budsjettkap. 571)
Regjeringa sitt forslag til endringar i revidert nasjonalbudsjett 2010 vart vedteke i Stortinget 18. juni 2010. I vedlegg 1 er kommunevis fordeling av rammetilskotet i 2010 etter stortingsbehandlinga vist.
Endringane vert føretatt i innbyggjartilskotet (kap. 571, post 60). Endringane vert i sin heilskap føretatt på juli-terminen av rammetilskotet.
Forklaring til vedlegg 1
Kolonne 1:
Rammetilskotet til kommunane etter saldert budsjett 2010 (jf. rundskriv H- 12/09).
Kolonne 2:
Endring i innbyggjartilskotet (post 60) i revidert nasjonalbudsjett 2010. Innbyggjartilskotet vert auka med 7,3 millionar kroner som kompensasjon for meirutgifter frå og med 1. august 2010 ved skyss til funksjonshemma til og frå skulefritidsordninga.
Kolonne 3:
Rammetilskotet til kommunane i 2010, inkludert endringa i revidert nasjonalbudsjett 2010.
4. Endringar i rammetilskotet til fylkeskommunar i 2010 (budsjettkap. 572)
Regjeringa sitt forslag til endringar i revidert nasjonalbudsjett 2010 vart vedteke i Stortinget 18. juni 2010. I vedlegg 2 er fylkeskommunevis fordeling av rammetilskotet i 2010 etter stortingsbehandlinga vist.
Endringane vert føretatt i innbyggjartilskotet (kap. 572, post 60), og vert i sin heilskap føretatt på juli-terminen av rammetilskotet.
Forklaring til vedlegg 2
Kolonne 1:
Rammetilskotet til fylkeskommunane i statsbudsjettet 2010 (jf. rundskriv H- 12/09).
Kolonne 2-5:
Kolonne 2-5 viser endringar i innbyggjartilskotet (post 60) i revidert nasjonalbudsjett 2010. Innbyggjartilskotet vert auka med 14 millionar kroner.
Kolonne 2:
Endringar i innbyggjartilskotet, eksklusive saker med særskilt fordeling. Endringane omfattar meirutgifter i høve rett til skyss for funksjonshemma til og frå skulefritidsordninga frå og med 1. august 2010 (3,5 millionar kroner), og redusert trekk i fylkeskommunane si samla inntektsramme for elevar i private vidaregåande skular (16,4 millionar kroner), i alt 19,9 millionar kroner.
Kolonne 3:
Endringar i NOx-kompensasjon for gamle fylkesvegferjer.
Kolonne 4:
Endringar i NOx-kompensasjon for nye fylkesvegferjer, dvs. ferjer overført til fylka etter forvaltingsreforma. Alt i alt utgjer endringane i NOx-avgiftene (kolonne 3 og 4) eit trekk på 9,9 millionar kroner.
Kolonne 5:
Endringar i løyvinga til fagskuleutdanning. Tre skular som tidlegare vart finansiert via kap. 6A i privatskulelova har meldt overgang til fagskulelova. Tilskotet til desse kommunane vert difor lagt inn i rammetilskotet til Oslo og Rogaland.
Kolonne 6:
Rammetilskotet til fylkeskommunane i 2010, inkludert endringane i revidert nasjonalbudsjett 2010.
5. Øyremerka tilskot
Når det gjeld løyvingsendringar i øyremerka tilskot for 2010, sjå vedlegg 3.
6. Statsbudsjettet 2011
Prop. 1 S (2010-2011) vert etter planen lagt fram tysdag 5. oktober 2010.
Med helsing
Grete Lilleschulstad e.f.
underdirektør
Guri Stenvåg
rådgjevar
vedlegg