5 Finansieringsopplegg

Dagens Førdepakke

Finansieringa av Førdepakken for perioden 2016–2028 var basert på bompengar, kommunale midlar, fylkeskommunale midlar og statlege midlar, i tillegg til mva.-refusjon innanfor ei økonomisk ramme på totalt 1 650 mill. 2015-kr. Av dette var bompengebidraget føresett å utgjere 983 mill. 2015-kr.

Fram til utgangen av 2023 hadde Førdepakken finansiert prosjekt til en samla kostnad på 1 221 mill. 2024-kr. Av dette utgjer bompengebidraget 667 mill. kr. Staten har bidrege med 186 mill. kr, medan fylkeskommunen og kommunen har bidrege med høvesvis 151 mill. kr og 217 mill. kr inkl. mva.-kompensasjon. Tala er oppjustert frå 2023-kr til 2024-kr med bruk av ein budsjettindeks på 4 pst. Frå innkrevjinga av bompengar starta i 2016 og frem til utgangen av 2023 vart det kravd inn 778 mill. i laupande kroner. Likviditeten i Førdepakken er god og pakken har ikkje gjeld.

Revidert Førdepakke

Tabell 5.1 synar attståande kostnader for fullførte prosjekt og venta kostnader for å fullføre pågåande og bygge attståande prosjekt i perioden 2024–2029 som inngår i den reviderte Førdepakken. Kostnadsanslaga vart oppdaterte våren 2023.

Det reviderte finansieringsopplegget med forlenging av bompengeinnkrevjinga i perioden 2028–2033 er rekna å gje eit bompengebidrag på 615 mill. kr. Det er også lagt til grunn ytterlegare 126 mill. kr i mva.-kompensasjon. Saman med midlane som står att frå tidlegare, gjev dette ei total ramme til vegprosjekt i perioden 2024–2033 på 2 157 mill. 2024-kr, jf. tabell 5.2.