Internasjonalt samarbeid om forsking og innovasjon innan helse

Helse er eitt av seks særleg prioriterte områder som er løfta i Langtidsplan for forsking og høgare utdanning. Forsking- og innovasjonssamarbeidet gjennom EUs forskings- og innovasjonsprogram Horisont Europa (forskningsradet.no) står heilt sentralt i dette arbeidet. Her er helse ein av hovudprioriteringane.

Nødvendig med internasjonalt samarbeid

Fleire norske forskings- og innovasjonsmiljø innanfor medisin og helse ligg på eit høgt internasjonalt nivå. Dette gjer seg gjeldande ved betre norsk retur frå Horisont Europa innan helse. 

Den vitskaplege og teknologiske utviklinga i samfunnet generelt og behovet for heilskapstenking har auka kompleksiteten i dei problemstillingane som fagmiljøa fokuserer på.

Dette, i tillegg til auka vitskapleg spesialiseringsgrad, gjer det nødvendig å samarbeide over landegrensene.

Deltaking i studiar

Store kliniske studiar krev også stort tilfang av pasientar som vil delta i prosjekta.

Deltaking i internasjonale prosjekt er kompetansebyggande og gir både fagleg og økonomisk draghjelp til å løysa sentrale forskings- og innovasjonsoppgåver.

Samtidig er internasjonalt samarbeid eit utstillingsvindauge for norske fagmiljø.

Horisont Europa

Noreg deltar gjennom EØS-avtalen som fullverdig medlem av Horisont Europa.

Internasjonalt FoU-samarbeid innan helse skjer hovudsakleg gjennom deltaking i dette programmet, ni partnerskap knytte til programmet og eit samfunnsoppdrag (mission) om kreft i regi av EU.

I tillegg er det tettare kopling mellom dei ulike programmene i regi av EU, som mellom anna EU4Health, for å få til betre synergiar mellom desse enn tidlegare.

Aktiv partnar

Noreg må vere aktiv for å sikra deltaking i utviklinga av det europeiske innovasjonssystemet. Regjeringa arbeider for å ivareta norske interesser, mellom anna innan helsesektoren, i Horisont Europa.

Helse er eit viktig tematisk forskings- og innovasjonsområde under hovudpilaren Globale utfordringar og konkurransedyktig næringsliv. Her er helse eitt av seks særskilde prioriterte område.

Helse- og omsorgsdepartementet bidrar også til forsking på global helse, både gjennom bidrag til satsing på global helse i Noregs forskingsråd, partnerskapet for europeiske- og utviklingsland om klinisk utprøving (edctp.org) og deltaking i WHO sitt arbeid på helseforsking.

Lenker

• Nordforsk (nordforsk.org)
• Norsk deltaking i EU sitt rammeprogram for forsking og innovasjon (forskningsradet.no)
• Europeiske partnerskap (forskningsradet.no)
• Cancer Mission (cancermission.no)
• Forsking hjå Verdas helseorganisasjon (who.int)
• Panorama – Regjeringa sin strategi for forskings- og høgare utdanningssamarbeid med Brasil, Canada, India, Japan, Kina, Russland, Sør-Afrika, Sør-Korea og USA (2021–2027)