Stáhtačálli Anders J. H. Eira Gielda-ja guovlludepartemeanttas rahpá odne 1.beaivvi čakčamánu Álgoálbmotvuoigatvuođaid gelbbolašvuođaguovddáža Guovdageainnus.

Gelbbolašvuođaguovddáš galgá háhkat ja juohkit dieđuid sámiid ja eará álgoálbmogiid birra. Dat galgá lasihit máhtu ja ipmárdusa álgoálbmogiid vuoigatvuođaid ja sámiid vuoigatvuođaid hárrái.

- Ráđđehus sávvá dan gelbbolašvuođaguovddáža ceggemiin nannet barggu oažžut oidnosii dehálaš hástalusaid mat sámiin ja eará álgoálbmogiin leat, ja dat bargu lea oassin olmmošvuoigatvuođabargguin, dadjá stáhtačálli Anders J.H.Eira.

Gelbbolašvuođaguovddáš galgá leat iešheanalaš ásahus ja ressursan álgoálbmotbarggus. Doaibma galgá leat oassin fágalaš fierpmádagas eará ásahusaiguin mat barget sullásaš áššiiguin.

Sámediggi ja Gielda- ja guovlludepartemeanta leaba ovttasráđiid nammadan guovddážii stivrra Romssa universitehta, Norgga guovddáža olmmošvuigatvuođaide, Davviriikaid sámeráđi, Sámi instituhta ja Sámi allaskuvlla rávvaga mielde. Guovddáš álggahuvvo golmmain bargiin.

• Pressemeldingen på norsk