Jagi 2004 lea biddjon velá 7 miljovnna ruvnno guovttegielalašvuođabargui sámigiela hálddašanguovlluide. – Ráđđehus áigu daiguin ruđaiguin nannet sámegiela geavaheami almmolašvuođas, dadjá stádaráđđi Erna Solberg.

Sámediggi galgá juohkit daid ruđaid sámegiela hálddašanguovlluid suohkaniidda ja fylkkasuohkaniidda. Dán guovllus- Kárášjoga, Guovdageainnu, Deanu, Unjárgga ja Poršáŋggu suohkaniin Finnmárkkus ja Gáivuonas Romssas – lea sámegiella ovttadássásaš dárogielain.

Sámediggi hálddaša sámi dulkonbálvalusaid- ja guovttegielalašhálddašeami doarjaga, ja gokčá daid goluid mat suohkaniin ja fylkkasuohkaniin leat daid oktavuođas. Jagi 2002:s ja 2003:s nannii Ráđđehus dán doarjaga ja bijai oktiibuot 15,2 miljovnna dása. Danne lea nu ahte dán jagi hálddaša Sámediggi sullii 35 miljovnna gielladoaimmaide. Dán jagi lasiheapmi vel boahtá dasa lassin, nu ahte gielladoaimmain lea de oktiibuot 42 miljovnna ruvnno.

- Dainna juolludemiin lea Ráđđehus ollásit deavdán daid dárbbuid mat bohte ovdan raporttas ” Suohkaniid ja fylkkasuohkaniid golut guovttegielalašvuhtii”, dadjá Solberg. Bargojoavku maid Gielda- ja guovludepartemeanta lei nammadan gárvvistii raporta miessemánu 2002.