Giđa mielda šaddá vejolažžan atnit sámi boallobeavddi ja dáhtonformáhtaid Microsoft Office ođđa veršuvnnas mii almmuhuvvo dáid beivviid. Dat lea boađusin earret eará čoahkkimis mas leigga Ansgar Gabrielsen ja Microsoft-hoavda Steve Ballmer árabuš dán jagi.

- Norgga eiseválddit ja sámi birrasat leat máŋggaid jagiid rahčan dan ala ahte oažžut dán ortnegii Microsofta buktagiin. Dát lea dehálaš oláhus erenoamážit sámi álbmogii mii dál oažžu sakka buoret vejolašvuođaid atnit iežas giela elektruvnnalaš dieđuidmeannudemiin, dadjá IT-ministtar Ansgar Gabrielsen.

Stádačálli Anders J. H. Eira Gielda- ja guovludepartemeanttas lea hui ilus otná ođđasiid dihte. Dál lea vuođđu beassat atnit sámegiela máŋgga sajiin.

- Dat dáidá leat dat deháleamos mii lea geavvan sámegielas guhkes áigái, dadjá son ja čilge vel: Dá lea maid boađus golmma davvi stádaráđiid oktasaš rahčamis. Dat čájeha ahte go koordinere almmolaš dárbbuid de lea dat mii lea beaktileamos vuohki dasa ahte oažžut márkanaktevrraid fállat daid buktagiid maid mii dárbbašit.