Gielda- ja guovludepartemeanta áigu dál bidjat johtui doaimma maid gohčodit ”sámi ofelaččat”. Doaibma lea jurddašuvvon skuvllaide, organisašuvnnaide ja servviide miehtá riikas. Sámi nuorat galget mátkkoštit ja oahpahit sámi diliid birra. Ja erenoamážit eará nuorat leat ulbmiljoavkkut.

Dál lea sámi álbmotbeaivi virggálaš levgenbeaivi ja dan čalmmustahttima oktavuođas deattuha gielda- ja guovluministtar Erna Solberg man mávssolaš lea ahte sámivuohta dahkkojuvvo oainnusin reálistalaš ja albma vugiin servodagas.

-Ain leat ollusat geat dihtet unnán sápmelaččaid birra, sin kultuvrra ja eallinvuogi birra, dan birra geat sii leat ja gos sii orrot, ja maid makkár vuoigatvuođat sis leat Norgga álgoálbmogin, dadjá gieldaministtar. –Go olbmot dihtet unnán de dat sáhttá dagahit sidjiide ovdagáttuid ja boasttu ipmárdusaid. Ja dat sáhttá bohcidahttit vealaheami ja dárbbašmeahttun vuostevuođaid. Danne áigu ráđđehus bargat ollu dainna ahte oahpahit ja oainnusin dahkat, dadjá Solberg.

- Mii áigut vuos álggus almmuhit stipeandaruđaid golmma nuorra olbmui geat sáhttet bargat iešguđet báikkiin riikas, dadjá gieldaministtar. – Nuorat galget leat hálddahuslaččat čadnon Sámi allaskuvlii Guovdageainnus. Allaskuvllas lea fágalaš ovddasvástádus ja dat galgá maid doaibmat gaskkustanguovddážin iešguđet bargguin. Mis lea maid dasa lassin jurdda rekrutteret eará nuoraid fierpmádahkii. Dat nuorat sáhttet leat eaktudáhtolaš báikkálaš ofelažžan dain báikkiin gos sii orrot.

Solberg deattuha ahte dat doaibma lea lassin eará diehtojuohkindoaimmaide. Son dadjá maid ahte dát lasiha dieđuid ja ságastallama sámiid birra peršuvnnalaš ja njuolggo vugiin. – Mus alddán lea hui stuora jáhkku ahte dákkár diehtojuohkin gaskkusteapmi doaibmá bures, loahpaha gieldaministtar. Son sávvá sámi nuoraid dán atnit hástaleaddji vejolašvuohtan dasa ahte oažžut olbmuid eambbo diehtit ja ipmirdit sin iežaset álbmoga eallima ja kultuvrra.