Regjeringa søkjer om å få starta forhandlingar om deltaking på EU-sida i utviklinga av satellittnavigasjonssystemet Galileo. Dette vil bidra til at norske behov innan satellittnavigasjon kan bli tatt vare på også i den vidare utviklinga av systemet, og det vil gje norske høgteknologibedrifter høve til å konkurrera om utviklingsoppdrag til satellittar og bakkestasjonar i Galileo. Noreg bidrar med totalt 152 millionar kroner til utviklingsfasen av prosjektet. Dersom Noreg også blir med i utbyggingsfasen, har industrien håp om kontrakter for 670 millionar kroner.

Nærings- og handelsminister Børge Brende og fiskeri- og kystminister Svein Ludvigsen offentleggjer avgjerda i Regjeringa om å søkja om deltaking i Galileo-prosjektet. Galileo, som er under utvikling, vil bli eit uavhengig europeisk system, som samtidig blir kompatibelt med det amerikanske GPS.

Galileo er eit EU-prosjekt av stor relevans, både for samfunnsmessige, tryggleiksstrategiske og økonomiske interesser. For å ta vare på norske interesser har Fiskeri- og kystdepartementet og Norsk Romsenter delteke aktivt i arbeidet med å definera Galileo-systemet. I utviklingsfasen er Galileo eit samarbeid mellom EU og den europeiske romorganisasjonen ESA (European Space Agency). Fram til no har norsk industrideltaking i Galileo kun vore knytt til forsking og utvikling gjennom deltakinga i ESA. Noreg har såleis deltatt på halvt nivå i høve til EU-landa, noko som har avgrensa norsk industrideltaking i utviklingsarbeidet. Målet med å få til ein avtale med EU er at norsk industri skal få delta på lik line med industribedrifter i EU-landa.

Noreg har omfattande navigasjonsinteresser, spesielt på grunn av store land- og havområde, spreidd busetnad og sårbar natur. Deltaking i Galileo vil bidra til at utviklinga i norsk navigasjonsinfrastruktur følgjer EU. Transport, navigasjon og posisjonering vil gjera bruk av signal frå Galileo – både på land, til sjøs og i lufta.

Nærings- og handelsdepartementet har sendt brev til EU-kommisjonen og bedt om å få starta forhandlingar om deltaking i Galileo på EU-sida. Frå norsk side er det venta at forhandlingane kan gjennomførast raskt, slik at ein avtale vil vera på plass tidleg i 2005.

For å sikra både industrideltaking og navigasjonspolitiske interesser vil vidare forhandlingar skje i samarbeid mellom Nærings- og handelsdepartementet og Fiskeri- og kystdepartementet.