Movt sáhttá bálvalusfálaldat buoridit sámi álbmogii?
Artihkal | Maŋimuš ođasmahttojuvvon: 23.08.2024 | Gielda- ja guovlodepartemeanta
Jahkásaš stuoradiggedieđáhus sámi giela, kultuvrra ja servodateallima birra galgá 2025:s gieđahallat gielddaid ja fylkkasuohkaniid ovddasvástádusa bálvalusfálaldagain sámi álbmogii. Danne bivdá Gielda- ja guovlodepartemeanta cealkámušaid dieđáhussii.
Ráđđehus ráhkada jahkásaččat stuoradiggedieđáhusa sámi giela, kultuvrra ja servodateallima birra, iešguđetlágan fáttáiguin juohke jagi. Ráđđehus lea mearridan ahte 2025 fáddá lea ráddjejuvvon dasa ahte gieđahallat suohkaniid ja fylkkasuohkaniid ovddasvástádusa addit buriid ja dásseárvosaš bálvalusaid sámi álbmogii. Dieđáhusas galget dearvvašvuođa- ja fuolahusbálvalusat vuoras sápmelaččaide, mánáidsuodjalus ja heahteguovddášfálaldagat loktejuvvot ovdán, lassin eará sosiála- ja čálgofálaldagaide maid earret eará bargo- ja čálgohálddašeapmi (NAV) lágida. Dieđáhusas gieđahallojit fálaldagat mat veahkehit nannet mánáid ja nuoraid sámi giela ja identitehta.Lea maid áigeguovdil guorahallat muhtun fáttáid mat váldojuvvojedje ovdan guovtti maŋemus jahkásaš stuoradiggedieđáhusas, gelbbolašvuođa ja rekruterema birra mánáidgárddiin, vuođđooahpahusas ja alit oahpus ja álbmotdearvvašvuođa birra sámi álbmogis.
Dieđáhusa barggus boahtit mii gulahallat guoskevaš departemeanttaiguin ja Sámedikkiin. Mii gulahallat maid KS:ain.
Mii háliidit áinnas rávvagiid áigeguovdilis doaibmabijuide buoridan dihtii gielddaid ja fylkkagielddaid bálvalusfálaldagaid sámi ássiide.
Sáddes iežat cealkámušaid ovdal skábmamánu 8. beaivvi 2024 skoviin dás vuollelis.
Cealkámušat almmuhuvvojit dađistaga dán siiddus. Vástádusat main leat áitagat dahje gudnerihkkumat eai almmuhuvvo.