Gollegiella – Davviriikkalaš sámi giellabálkkašupmi geigejuvvo čakčat 2012
Artihkal | Maŋimuš ođasmahttojuvvon: 27.08.2012 | Gielda- ja guovlodepartemeanta
Gollegiella lea davviriikkalaš sámi giellabálkkašupmi maid Norgga, Ruoŧa ja Suoma sámeministarat ja sámediggepresideanttat leat ásahan. Gollegiella mearkkaša dárogillii "gullspråk" ja dat juhkkojuvvo ovttaskas olbmuide, joavkkuide, organisašuvnnaide dahje ásahusaide mat mávssolaččat leat rahčan ovddidit sámegiela.
Ovttaskas olbmot, organisašuvnnat, ásahusat ja eiseválddit Norggas, Ruoŧas, Suomas ja Ruoššas sáhttet evttohit kandidáhtaid giellabálkkašupmái jagis 2012. Sádde evttohusa oktan čálalaš ákkastallamiin mii sáhttá leat eanemusat 1-2 siiddu ovdal čakčamánu 3. b. 2012.
Gollegiella - Davviriikkalaš sámi giellabálkkašupmi - ásahuvvui 2004s sámi áššiid ministariin ja sámediggepresideanttain Norggas, Ruoŧas ja Suomas. Bálkkašupmi sturrodat lea 15 000 euro ja dat juhkkojuvvo juohke nuppi jagi. Giellabálkkašupmi geigejuvvo viđát geardde čakčat 2012 sámeministariid ja sámediggepresideanttaid jahkásaš čoahkkimis Oslos.
Gurut ravddas Nina. N. Mironova, Harald Gaski (jođiheaddji), Bierna Bientie, Anna Margith Påve. Miellahttu Anna Morottaja ii leat govas.
Árvvoštallanlávdegoddi vállje giellabálkkašumi vuoiti. Árvvoštallanlávdegotti miellahtut 2012-2013 leat Harald Gaski (jođiheaddji), Anna Morottaja, Anna-Margith Påve, Nina Nikolaevna Mironova ja Bierna Bientie.
Bálkkašumi ulbmil
Giellabálkkašumi ulbmil lea ovddidit ja seailluhit sámi gielaid Norggas, Ruoŧas, Suomas ja Ruoššas.
Gii sáhttá oažžut bálkkašumi?
Giellabálkkašupmi juhkkojuvvo ovttaskas olbmuide, organisašuvnnaide, servviide ja ásahusaide Norggas, Suomas, Ruoŧas ja Ruoššas geat leat bargan sámegiela ovdánemiin čálalaččat, njálmmálaččat dahje eará vugiid mielde. Buotlágán doaibmabijut ovddidan dihte sámegiela váldojuvvojit vuhtii. Lea vejolaš juohkit bálkkašumi eambbo go ovtta vuoitái.
Sádde evttohusa ovdal čakčamánu 3. b. 2012, e-poastta dahje poastta mielde:
Gollegiella – Árvvoštallanlávdegoddi
SAMI, Ođasmahttin- ja hálddahus- ja girkodepartemeanta
Poastaboksa 8004 Dep
0030 OSLO
Norway
e-poasta: postmottak@fad.dep.no
Tel: +47 22 24 71 75
Dieđut:
Eva Måsø, eva.maso@fad.dep.no
Magnus Forberg Andersen, magnus-forberg.andersen@fad.dep.no
DUOGÁŠ
Sámegielaid birra
Lea rehkenastojuvvon ahte sullii 20 000 - 30 000 olbmo sámástit. Gollegiella lea ásahuvvon dan dihte ahte movttiidahttit sámi gielaid ovddidan- ja ealáskahttinbargguid. Stuorimus sámegiella lea davvisámegiella mii ságastuvvo Norggas, Ruoŧas ja Suomas. Ruoŧas ja Norggas ságastuvvo maiddái lullisámegiella, julevsámegiella, upmisámegiella ja pitesámegiella. Suomas gávdno earret davvisámi maiddái anársámegiella ja nuorttalaš sámegiella. Ruoššas leat eanas ságasteaddjit gielddasámegielagat ja hui unnán olbmot ságastit nuorttalaš sámegiela, ákkala sámegiela ja tersámegiela. Sámegielat leat uhkiduvvon.
Ovdalaš bálkkašumi vuoitit
2010
Guokte sámi nissona, Máret Sárá, Kárášjogas ja Lajla Mattson Magga, Guovdageainnus juogadeigga 2010 giellabálkkašumi. Sárá lea ovddidan davvisámegiela oahpaheaddjin, journalistan ja girječállin ja son lea čállán oahppogirjjiid ja čohkken sihke stohkosiid ja sátnevádjasiid girjin. Mattson Magga lea barggustis bokte gáhtten, oahpahan ja ovddidan lullisámegiela. Son lea čállán lullisámi sátnegirjjiid, čáppagirjjálašvuođa- ja fágagirjjiid, ja lea dasa lassin jorgaladdan ja čohkken giellateavsttaid.
2008
Sámi Siida Ohcejogas Suomas ja Henrik Barruk Straejmies Ruoŧas juogadeigga 2008 jagi bálkkašupmi. Sámi Siida oaččui bálkkašumi danin go sii leat 1970-logu rájis bargan sámegiela sajádaga nannemiin Ohcejoga gielddas. Henrik Barruk lea guhká bargan upmisámegiela dokumenteremiin ja ealáskahttimiin. Vuosttaš čállagat mat prentejuvvojedje 1600-logus ledje čállojuvvon upmisámegillii, earret eará okta ABC-girji.
2006
Harald Gaski ja Jouni Moshnikoff oaččuiga 2006 giellabálkkašumi. Jouni Moshnikoff (1940-2012) gudnejahttojuvvui go lea nu guhká ja garrasit bargan nuortasámegiela ovddidemiin. Harald Gaski lea dahkan viiddes giellaovddidanbarggu ja lea iežas dutkama bokte leamaš veahkkin loktet stáhtusa sámegielat girjjálašvuođas.
2004
Ella Holm Bull ja Anarâkielâ servi (anársámegiellasearvi) ožžo easka ásahuvvon davviriikkalaš sámegiellabálkkašumi Gollegiella jagis 2004. Ella Holm Bull (1929-2006) ražai eallinagi lullisámegiela ovddidemiin. Su ulbmil leai loktet giela geavaheami sihke njálmmálaš ja čálalaš giellan. Anarâkielâ servi lea dan rájis go searvi ásahuvvui Anáris jagis 1986 garrasit bargan anársámegiela ealáskahttimiin.